Бүгүн Дьокуускайга «ONCORUN — 2026» сүүрүү ыытылынна. Бу сүүрүү онкологическай ыарыылаах дьону өйүүр сыаллаах ыытыллар.
Үтүө санаа аахсыйатыгар СӨ Бырабыыталыстыбатын Бэрэссэдээтэлин солбуйааччы Ольга Балабкина кыттыыны ылла. Кини Саха сирин салалтатын уонна тус бэйэтин аатыттан бу тэрээһини өйөөччүлэргэ, аахсыйаны тэрийээччилэргэ махтанна.
—Арассыыйаҕа уонна Саха сиригэр кэмиэрчэскэйэ суох тэрилтэлэри өйүүргэ туһуламмыт бырайыактар олоххо киирэллэр. Капиталина Алексеева салалтатынан ыытыллар «Антирак. Поддержка выживших» хамсааһын дьону түмэр. Искэн ыарыытын туораабыт дьону социализациялааһыҥҥа улахан үлэ ыытыллар. Биһиги манна бу сүүрүүнү өйүүбүт, итиэннэ былырыын көрсүбүт дьоммутун өссө көрсүөхпүтүн баҕарабыт. Итиэннэ дьон-сэргэ эмтэммэт ыарыылар суохтар диэҥҥэ итэҕэйэллэригэр, олох олорор баҕа санаа күүстээх буоларыгар итэҕэйиэхпин баҕарабын, — диэн Ольга Валерьевна бэлиэтээтэ.
Сүүрүү ытык-мааны Сайсары кытылыгар буолла. Искэн ыарыылаахтар «БИИРГЭ КЫАЙЫАХПЫТ!» диэн девиһинэн 450 м хаамтылар.
Оттон «ONCORUN — 2026» сүүрүү кыттыылаахтара араас дистанцияларга илин-кэлин түһүстүлэр. Ол курдук, оҕолор 900 м сүүрдүлэр, улахан дьон 3 уонна 10 км күрэхтэстилэр. Тэрээһиҥҥэ Петр Шамаев — байыаннай дьайыы бэтэрээнэ, СӨ ыччат миниистирэ, Александр Моедо — суукканы быһа сүүрүүгэ Арассыыйа чөмпүйүөнэ кыттыыны ыллылар.
Тэрийээччилэринэн СӨ доруобуйа харыстабылын, ыччат уонна успуорт министиэристибэлэрин, партнердар уонна уопсастыбаннай түмсүүлэр өйөбүллэринэн өрөспүүбүлүкэтээҕи онкологическай киин уонна «Антирак: поддержка выживших» хамсааһын буоллулар.
«Вместе победим!» сүүрүү аан бастаан былырыын ыытыллыбыта. Онно 500 киһи кыттыыны ылбыта. Бу өйөбүл уонна сомоҕолоһуу бэлиэтин туоһулуур.
Сиһилии: https://www.sakha.gov.ru/news/52047
СӨ Ил Дарханын уонна Бырабыыталыстыбатын пресс-сулууспата
Саргын Скрябин хаартыскаҕа түһэриитэ, ЯСИА