Кулун тутар 8 күнэ буолаары турар. Таптыыр кыыһыҥ куоскалаах буоллаҕына, ханнык сибэккини бэлэхтиириҥ кыһалҕалаах дьыалаҕа кубулуйарыгар тиийэр.
Бэтэринээринэй мэдисиинэ хандьытаата Дмитрий Блюменкранц этэринэн, кырасыабай сибэкки дьөрбөтө дьиэ иһинээҕи кыылларга улахан кутталы оҥоруон сөп. Ол курдук, куоскалар сибэкки сэбирдэҕинэн оонньууллар, ыстыыллар, ваза уутун иһиэхтэрин сөп.
“Ордук лилиялар кутталлаахтар, — диир эспиэр – Бэрт кыра да сибэкки быыла эбэтэр ваза уута бүөрүгэр охсуон сөп. Тюльпаннар, гиациннар эмиэ сэрэхтээхтэр: бөлтөҕөр төрдүлэригэр уонна умнастарыгар куосканы хотуолатар, иһин ыарытыннарар, майгытын алдьатар веществолар бааллар. Нарцисс эмиэ кутталлаах“.
Хризантемалар уонна альстромериялар куртаҕын, оһоҕоһун ыарыталлар, аллергиялаталлар. Роза улахан куттала суоҕунан ааҕыллар гынан баран, иннэлэрэ уонна үүннэрэллэригэр элбэх химияны туттубут буоллахтарына, кыһалҕаны үөскэтиэн сөп.
“Онон куоска баар дьиэтигэр орхидея, гербер, эустома, подсолнух баара ордук. Суулуур пленка, лиэнтэ, араас киэргэллэр үүнээйиттэн итэҕэһэ суох кутталлаахтар”, — диир бэтэринээр.