Дьокуускайга XVII төгүлүн ыытыллар “Сыл иитээччитэ-2026” күөн күрэс өрөспүүбүлүкэтээҕи түһүмэҕэ саҕаланна. Быйыл Саха сирин араас улуустарыттан барыта 25 иитээччи кыттар.
Үөрэҕи сайыннарар уонна идэ таһымын үрдэтэр институт дириэктэрэ Юрий Шишигин: “Сыл иитээччитэ” күөн күрэс эрээри, биһиги иитээччилэр уопуттарын атастаһар, тарҕатар, идэ таһымын үрдэтэр, саҥа педагогтардыын билсэр былаһаакка быһыытынан көрөбүт. Манна улууска кыайбыттар кэлэн тураллар, идэлэрин маастарыстыбаларын көрдөрүөхтэрэ. Бастыҥтан бастыҥнар күөн күрэс Арассыыйатааҕы түһүмэҕэр кыттыахтара. Хорсуҥҥутун киллэриҥ, сатабылгытын, хайдах үлэлииргитин көрдөрүҥ” – диэн кыттааччыларга туһаайан эҕэрдэтин, баҕа санаатын тириэртэ.
Тэрээһин үөрүүлээх аһыллыытыгар Хаҥалас улууһун Мохсоҕолоох бөһүөлэгин оҕону сайыннарар киинин “Божья коровка” ансаамбылын иитиллээччилэрэ уонча буолан сыанаҕа тахсан, скрипкаҕа оонньоон, көрөөччүлэри үөртүлэр да, соһуттулар даҕаны. Тугунан соһуттулар диир буоллахха, саамай кыралара түөрт саастаах эбит. Онтон Дьокуускай куораттааҕы национальнай гимназиятын “Надежда” үҥкүү холбоһуктаах ансаамбылын оҕолоро ча-ча-ча үҥкүүлээн, кытттааччылар, көрөөччүлэр биһирэбиллэрин ыллылар. Бу бөлөххө саамай кыралара олох даҕаны үс саастаах диэтилэр. Онон муусуканан эҕэрдэлээбит оҕолор, иитээччилэр күөн күрэстэрэ буоларын толору итэҕэттилэр.
Быйылгы тэрээһин Арассыыйаҕа үөрэхтээһин эйгэтигэр Оскуола иннинээҕи уонна Норуоттар сомоҕолоһууларын сылыгар ананар. Тэрээһин үөрүүлээх аһыллыытыгар ону бэлиэтээн, хас биирдии кыттааччы бырата бэйэтин омугун төрүт таҥаһын таҥнан кэлбитэ сонун буолла, хараҕы үөртэ.
Быйылгы күөн күрэскэ соҕотох эр киһи кыттар – Өлүөхүмэ улууһун Чапаево бөһүөлэгин оскуолатын оскуола иннинээҕи бөлөҕүн иитээччитэ Сергей Кириллов:
— Дьокуускай куораттааҕы 2-с нүөмэрдээх педагогическай училищеҕа иитээччи идэтигэр үөрэммитим. Салгыы Омскайдааҕы гуманитарнай педагогическай академияҕа үрдэтиммитим. Барыта 11 сыл иитээччинэн үлэлээтим.
Бу күөн күрэскэ иккиһин кыттабын. 2021 сыллаахха, дьаҥ кэмигэр тэйиччиттэн ыытыллыбытыгар кыттан көрбүтүм.
Күөн күрэскэ саҥа билиини, ньыманы, сатабылы иҥэринэр баҕалаахпын. Биллэн турар, тэрээһин сыллата уларыйан иһэр. Онон син биир аан бастакытын кыттар кэриэтэбин, — диэн санаатын үллэстэр.
Амма улууһун “Хатыҥчаана” уһуйаанын иитээччитэ Елена Михайлова:
— “Сыл иитээччитэ” күөн күрэскэ аан бастакыбын кыттабын. Уһуйааҥҥа үлэлээбитим 18 сыл буолла. Быйыл кулун тутарга күөн күрэс улуустааҕы түһүмэҕэр бастаан, өрөспүүбүлүкэҕэ кыттаары кэлэн турабын. Долгутуулаах эбит, кыттааччылары кытта син билистим. Кыаҕым баарынан кыттыаҕым. Үс түһүмэхтээх, 25 кыттааччылаах, — диэн этэр.
