Муус устар 9-10 күннэригэр Таатта улууһун Ытык Күөлүгэр «Живое ремесло Таттинского улуса» үөрэх бырагыраамата саҕаланыаҕа. Ил Дархан гранын өйөбүлүнэн ыытыллар көҕүлээһин төрүт дьарыктары бигэ тирэхтээх айар биисинэскэ кубулутар хайысхалаах. Бастакы хардыынан икки күннээҕи олохтоох маастардарга анаммыт социокултуурунай бырайыактааһыҥҥа үөрэх семинара буолуоҕа.
Таатта улууһугар 170-тан тахса декоративнай-прикладной ускуустуба маастара олорор уонна үлэлиир, олортон 24-дэ Саха сирин норуотун маастара буолар, оттон 26-та Россия худуоһунньуктарын сойууһун чилиэнэ.
«Живое ремесло» диэн саҥа бырайыак сүрүн соруга — аныгы экономическай усулуобуйаларга маастардар ситиһиилээхтик үлэлииллэригэр анал үнүстүрүмүөннэргэ үөрэтии. Бырайыак бастакы тэрээһинэ — социокултуурунай бырайыактааһыҥҥа үөрэх семинара. Манна экспердэр салайыыларынан кыттыылаахтар айар идиэйэлэри бырайыак бэлэм сайаапкаларыгар кубулутарга үөрэниэхтэрэ.
«Биһиги дьоммут үгэстэри эрэ иҥэринэн илдьэ сылдьар маастардар быһыытынан эрэ биллибэккэллэр, айар экономикаҕа көдьүүстээхтик киирэллэригэр баҕарабыт. Бастакы семинарга быраактыкаҕа туттуллар билиилэри биэриэхпит: үбүлээһини хайдах булары, бырайыагы хайдах сөпкө таҥан таһаарары уонна бородууксуйаны ырыынакка хайдах таһаарары. Бу бигэ туруктаах маастарыскыайдары арыйарга бастакы хардыы», — диэн Таатта улууһун социальнай урбаанньыттарын уонна НКО ресурснай киинин дириэктэрэ, бырайыак салайааччыта Сардана Григорьева эттэ.
Семинар бырагырааматыгар үп-харчы грамотноһыгар, социокултуурунай бырайыактааһыҥҥа, маркетиҥҥа лиэксийэлэр уонна быраактыкалар, ону тэҥэ грант куонкурустарыгар сайаапкалары бэлэмнээһин киирдилэр. Анал болҕомтону дьиҥ-чахчы баар кейстары ырытыыга уонна тус консультацияларга ууруохтара.
Бу кэнниттэн Таатта улууһун делегацията Хакасияҕа стажировкаланыаҕа. «IIS, UUS, AS FEST» диэн этнобэстибээл чэрчитинэн «Живое ремесло» анал былаһаакка тэриллиэҕэ, манна Хакасия уонна Алтай экспертэрэ кыттыахтара. Онон бырайыак түмүгүнэн сүүсчэкэ маастар сатабылын үрдүүрэ, ону тэҥэ граҥҥа ситиһиилээх сайаапкалар ахсааннара, улууска саҥа социокултуурунай көҕүлээһиннэр эмиэ элбииллэрэ күүтүллэр.
Бырайыак партнердара: Таатта улууһун култууратын управлениета, Таатта улууһун дьаһалтата, Хомус киинэ уонна түмэлэ, бөһүөлэктэр икки ардыларынааҕы Горнай улууһун бибилэтиэкэтэ, Хакасия социальнай биисинэһин комплекснай арыаллааһынын киинэ уонна да атын тэрилтэлэр.