«Мисс УИС» күрэх Саха сиринээҕи түһүмэҕин финала «Арассыыйа – мин устуоруйам» устуоруйа пааркатыгар буолан ааста диэн СӨ УФСИН пресс-сулууспата иһитиннэрэр.
«Арассыыйа кэрэтэ» түһүмэх чэрчитинэн, кыттааччылар национальнай таҥастарын кэтэн, төрөөбүт дойдуларын туһунан кэпсээтилэр. Видео-билиһиннэриилэргэ бэйэлэрин идэлэрин олус таптыылларын туһунан үллэһиннилэр: үксүлэригэр идэни талыыга төрөппүттэрин холобура, бэйэни салайыныыга дьулуһуу уонна Ийэ дойдуга сулууспалыыр баҕа санаа төрүөт буолбут. Онтон күрэхтэһээччилэр офицердары уонна тэрээһин ыалдьыттарын кытта пааранан вальстаатылар, ону тэҥэ, үгэс курдук, сулууспалыыр формалаах уонна киэһээҥҥи былаачыйалаах дефилеҕэ хааман көрдөрдүлэр.
Дьүүллүүр сүбэ сүбэлэһии кэнниттэн күрэх түмүгүн биллэрдэ.
«Мисс УИС» титул хаһаайкатынан Валерия Макарова буолла. «Вице-мисс» уонна «Көрөөччүлэр биһирэбиллэрэ» ааты Яна Антипина ылла, оттон иккис «Вице-мисс» — Мария Мордосова буолла.
Анал ааттарга кыайыылаахтарынан ааттаннылар: «Мисс профессионализм» — Олеся Мутовина, «Мисс артистизм» — Анастасия Воронина, «Мисс оригинальность» — Ангелина Березкина, «Мисс Грация» — Жанна Спиридонова.
