Бу күннэргэ А.П. Гоголев аатынан Чурапчытааҕы оҕо ускуустубатын оскуолатыгар өрөспүүбүлүкэтээҕи мэтириэти көрөн олорон уруһуйдааһын күөн күрэһэ буолан ааста.
Чурапчытааҕы Оҕо ускуустубатын оскуолатын живопись кылааһын преподавателэ Катерина Захарова айар куттаах тэрээһин туһунан бу курдук сырдатта:
— Куонкурус урукку сылларга ыытыллыбатах, ураты сонун сүүрээн-бырайыак быһыытынан толкуйдаммыта. Мин билэрбинэн, өрөспүүбүлүкэҕэ мэтириэти көрөн олорон уруһуйдааһын күөн күрэҕэ ыытылла илик. Онон биһиги оскуолабыт бу тэрээһини бастакынан саҕалааччы буолла.
Суолталаах тэрээһиммитин быйыл 90 сааһын туолар ытык кырдьаҕаспытыгар, кэллиэгэбитигэр, Чурапчы улууһун Чурапчы уонна Сылаҥ, Кэбээйи улууһун Мукучу нэһилиэктэрин бочуоттаах олохтооҕор, көһөрүллүү кыттыылааҕар Василий Николаевич Дьячковскайга анаатыбыт.
Куонкурус өрөспүүбүлүкэтээҕи «Бары уруһуйдуубут» (“Рисуем все”) бырайыак уонна Саха сиригэр Култуура сылын чэрчилэринэн ыытылынна.
Василий Николаевич Чурапчытааҕы муусука оскуолатыгар 1974 сыллаахха бастакы художественнай кылааһы арыйан, ситиһиилээхтик үлэлэппитэ. Кини ордук “Мэтириэти суруйуу” хайысханы сатабыллаахтык баһылаабыта. Мэтириэт — ураты маастарыстыбаны эрэйэр жанр. Манна киһи тас мөссүөнүн эрэ буолбакка, ис эйгэтин, санаатын кытары тиэрдиэххэ сеп. Василий Дячковскай тыйаатырга да, оскуолаҕа да үлэлии сылдьан, үтүмэн үгүс суруйбут мэтириэттэрэ — бэйэтин идэтин таптыырын туоһута. Бу ытык киһибит бэйэтин идэтигэр таба тайаммытын үүнэр көлүөнэҕэ холобура.
Василий Николаевич 90 сааһын көрсө 90 акварелынан, тууһунан суруллубут мэтириэттэрин тэрээһиҥҥэ анаан быыстапкаҕа туруоруубут дьон болҕомтотун тарта, сэҥээриини ылла.
Куонкуруска Таатта, Амма, Чурапчы улууһун араас нэһилиэктэриттэн, Дьокуускай куораттан, Хатастан — барыта 60 кыттааччы кэлэн, тэрээһиммит өрөспүүбүлүкэтээҕи таһымнанна. Өссө даҕаны элбэх сайаапка киирэ туруоҕун аудиториябытыгар сөп түбэһиннэрэн хааччахтаабыппыт. Бастакы уонна иккис бөлөхтөргө саастарынан арааран – орто уопсай үөрэхтээһин уонна ускуустуба оскуолаларын 12-17 саастаах үөрэнээччилэр, үһүс бөлөххө – кинилэр уһуйааччылара, учууталлар, анал үөрэхтээхтэр, төрдүс бөлөххө уруһуйунан умсугуйааччылар кытыннылар.
Кыттааччылар 4 аудиториянан арахсан, үс чаас устата «натурщиктары» көрөн олорон , бэйэлэрин ньымаларынан уруһуйдаатылар.
Күрэспит биир кэрэхсэбиллээх түгэнэ — 89 саастаах ытык кырдьаҕаспыт Василий Николаевич хас аудитория аайы киирэн, кыттааччылары кытары тэҥҥэ «набросоктары» уруһуйдаан холонон көрдө.
Василий Николаевич, Светлана Георгиевна Дьячковскайдар уонна кинилэр оҕолоро Георгий Васильевич, Елена Васильевна, Парасковья Васильевна куонкуруспутун өйөөн, харчынан бириистэри туруордулар. Ол курдук, бастакы бириистээх миэстэҕэ — 5000 солкуобай, “Гран-При” кыайыылааҕар — 10 000 солкуобай харчынан бириэмийэни туруордулар.
Муҥутуур кыайыылааҕынан Таатта улууһун Ытык Күөл 1 №-дээх орто оскуолатын үөрэнээччитэ Владислава Александрова ааттанна.
Ити курдук, ытык киһибит Василий Николаевич Дьячковскай 90 сааһын көрсө Култуура сылыгар бэртээхэй тэрээһини бэлэх ууннубут.