Илиҥҥи экэнэмиичэскэй пуорум: 2027 сыллаахха хаһан ыытыллара быһаарылынна.
XII Илиҥҥи экэнэмиичэскэй пуорум эһиил Владивостокка , 2027 сылга атырдьах ыйын 31 күнүттэн балаҕан ыйын 3 күнүгэр диэри, ыытыллар. Бу туһунан РФ Бэрэсидьиэнин сүбэһитэ, ВЭФ тэрийэр кэмитиэтин эппиэттиир сэкирэтээрэ Антон Кобяков иһитиннэрдэ.
—Илиҥҥи экэнэмиичэскэй пуорум — норуоттар икки ардыларынааҕы таһымнаах тэрээһин. Манна федеральнай уонна эрэгийиэннээҕи былаас бэрэстэбиитэллэрэ биисинэһи кытта көрсөллөр, биһиги дойдубут уонна тас дойдулар тутаах эспиэртэрэ, экэнэмиистэрэ, социологтара тирээн турар суолталаах кыһалҕалары дьүүллэһэллэр, партнердуу сыһыан бөҕөргөтүллэр, киэҥ далааһыннаах инвестиционнай сөбүлэһиилэргэ илии баттаныллар уонна Уһук Илиҥҥэ бөдөҥ производстволар үлэлэрэ саҕаланар. ВЭФ Уһук Илин уонна хотугу эрэгийиэннэри сайыннарыы сүрүн хайысхаларыттан биирдэстэрэ буолар. Манна чэпчэтиилээх ипотеканы киллэрии уонна салгыы үлэлэтии бырагыраамалара, Уһук Илиннээҕи уонна арктическай куораттары реновациялааһыҥҥа бырагыраамалар, «Гектар» бырагырааманан сир учаастагын биэрии — Уһук Илин уонна дойдубут бүттүүнэ түргэтэтиллибит социальнай-экэнэмиичэскэй сайдыытыгар көмөлөспүт уонна салгыы көмөлөһөр боппуруостара ырытыллыбыттара, дьүүллэһиллибиттэрэ уонна ылыллыбыттара, — диэн этэр РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ, Илиҥҥи экэнэмиичэскэй пуорум тэрийэр кэмитиэтин бэрэссэдээтэлэ Юрий Трутнев.
Антон Кобяков этэринэн, пуорум ыытыллар кэмигэр инвестициялары тардыыга, норуоттар икки ардыларынааҕы бииргэ үлэлээһини бөҕөргөтүүгэ уонна Уһук Илин социальнай-экэнэмиичэскэй сайдыытыгар туһуламмыт быһаарыылары оҥорууга тутаах мэхэньиисиминэн буолбута.
—Макроэрэгийиэн бүгүн Арассыыйа Азия-Тиихэй акыйаан эрэгийиэнин дойдуларын кытта экэнэмиичэскэй сибээстэри бөҕөргөтүүгэ ордук суолталаах оруолу ылар. ВЭФ-2027 бииргэ үлэлээһин саҥа хайысхаларын быһаарарга, кэскиллээх бырайыактары билиһиннэрэргэ, Уһук Илин сайдыытыгар уонна дьон олоҕун хаачыстыбатын үрдэтиигэ эбии кыаҕы биэрэргэ көмөлөһөрүгэр эрэнэбин, — диэн этэр Антон Кобяков.
Пуорум бырагырааматыгар Уһук Илиннээҕи федеральнай уокурук 2030 сылга диэри социальнай-экэнэмиичэскэй сайдыытын, 2036 сылга диэри билгэлээһиннээх, XI Илиҥҥи экэнэмиичэскэй пуорум түмүгүнэн бигэргэтиллибит Стратегиятын олоххо киллэриини дьүүллэһии туспа миэстэни ылыаҕа.
ВЭФ 2015 сыллаахтан РФ Бэрэсидьиэнэ Владимир Путин Ыйааҕынан ыытыллар. Пуорум Владивостокка Уһук Илиннээҕи федеральнай университет кампуһун болуоссатыгар тэриллэр. Тэрийээччи — РФ Бырабыыталыстыбатын өйөбүлүнэн Росконгресс пуондата. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/66574
Хаартыскаҕа Андрей Сорокин түһэриитэ, ЯСИА