Арассыыйа Бырабыытаалыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ Юрий Трутнев Архангельскай куоракка «Арассыыйа Федерациятын Арктикатааҕы зонатын уонна Трансарктическай тырааныспар көрүдүөрүн сайыннарыы» кэлим бырайыагы оҥоруу хаамыытын туһунан мунньаҕы ыытта.
Бу кэлим бырайыак Мурманскай куоракка ыытыллыбыт «Арктика – кэпсэтии территорията» норуоттар икки ардыларынааҕы арктическай пуорум түмүгүнэн Арассыыйа Федерациятын бэрэсидьиэнэ Владимир Путин биэрбит сорудаҕар олоҕуран оҥоһуллар. Ону тэҥэ, бэрэсидьиэнэ сорудаҕынан ааспыт нэдиэлэҕэ Бырабыыталыстыба Арассыыйа Федерациятын Арктикатааҕы зонатын сайыннарыы саҥардыллыбыт Стратегиятын бырайыагын Куттал суох буолуутун Сэбиэтигэр киллэрбитэ. Стратегия бырайыагар этиллэринэн, кэлим бырайыак ону олоххо киллэриигэ сүрүн үнүстүрүмүөнүнэн буолуоҕа.
«Трансарктическай тырааныспар көрүдүөрүн олохтооһун Арассыыйа Федерациятын Арктикатааҕы зонатыгар эрэ буолбакка, бүтүн аан дойду уопсастыбатыгар стратегическай суолталаах соругунан буолар. Бу үлэни толорорго уонна Арассыыйа Федерациятын Бэрэсидьиэнэ Владимир Владимирович Путин туруорбут соруктарын олоххо киллэрэргэ федеральнай толоруулаах былаас уорганнарын, Арассыыйа Федерациятын субъектарын, бу эйгэҕэ үлэлиир акционернай уопсастыбалар чопчу уонна биир санаалаах дьайыылара ирдэнэр. Ааспыт сыл ахсынньытыгар буолбут мунньахха федеральнай толоруулаах былаас уорганнарыгар «Росатом», «Роскосмос» судаарыстыбаннай корпорациялары уонна «Арассыыйа тимир суоллара» АУо кытта бииргэ тимир суоллары тутууга, уу түгэҕин дириҥэтиигэ, таһаҕас баазатыгар кыамталары ырытан көрөргө уонна сөптөөх этиилэри бэлэмнииргэ сорудах биэрбитим. Бүгүн бу үлэ хайдах баран иһэрин истиэхпин баҕарабын», – диэн Юрий Трутнев мунньаҕы арыйда.
Арассыыйа Федерациятын Арктикатааҕы зонатын сайыннарыы уонна Арктикаҕа национальнай куттал суох буолуутун хааччыйыы саҥардыллыбыт Стратегията, ону тэҥэ кэлим бырайыак инфраструктураҕа, экэниэмикэҕэ уонна геобэлиитикэҕэ сыһыаннаах соруктары дьүөрэлээһиҥҥэ олоҕуран, Арктиканы сайыннарыы саҥа моделын олохтуохтара.
Сиһилии: https://www.sakha.gov.ru/news/57980