Дьокуускайга Арассыыйа Бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыактарынан, ону тэҥэ «Арассыыйа успуорда» судаарыстыбаннай бырагырааманан «Факел» успуорт комплекса хапытаалынай өрөмүөнэ түмүктэнэн эрэр. Бу туһунан «Патриот» ыччат киинин дириэктэрэ Сулустаан Заболоцкай иһитиннэрдэ.
Кини бэлиэтээбитинэн, саҥардыллыбыт комплекска Арассыыйа Бэрэсидьиэнин сорудаҕынан тэриллибит «ВОИН» ыччаты байыаннай-спортивнай бэлэмнэниигэ уонна патриоттуу тыыҥҥа иитэр Киин филиалын курсааннара дьарыктаныахтара. «Өрөмүөн үлэтэ түмүктэммитин кэннэ ыччакка анаан тир, тренажернай саалалар, уотунан ытыыга, тактическай мэдиссиинэҕэ уонна дроннары салайыыга аналлаах кылаастар аһыллыахтара. Сэп-сэбиргэл ууруллар хоско ураты болҕомто уурулунна — бу хос ГОСТ ирдэбилинэн толору эппиэттиир. Манна лазертаг тэриллэрэ уонна пневматическай саалар хараллыахтара. Билигин дьиэ иһинээҕи өрөмүөн түмүктэннэ, миэбэл уонна тэрил барыта туруорулунна. Эбийиэк тас өттүн оҥоруу уонна тулатынааҕы тиэргэни тупсарыы үлэтэ салҕанар», — диэн салайааччы кэпсээтэ.
Маны таһынан, Саха сирин Ил Дарханын нэһилиэнньэ доруобуйатын бөҕөргөтүүгэ стратегическай Ыйааҕын уонна «Биир ньыгыл Арассыыйа» баартыйа норуодунай бырагырааматын «Кэскиллээх доруобуйа» бырайыагын чэрчитинэн, «Факел» комплекска киэҥ далааһыннаах үлэ ыытылынна. Дьиэ кирилиэһэ саҥардылынна, бары этээстэр толору өрөмүөннэннилэр.
«Суунар-тараанар хостор саҥардылыннылар, үөрэнэр кылаастар, сэп-сэбиргэл уурар уонна ыскылаат хосторо кэҥэтиллинилэр. Хапытаалынай өрөмүөн кэмигэр «ВОИН» Киин курсааннарыгар, күрэсчиттэргэ уонна дьарыктанааччыларга аныгылыы уонна табыгастаах усулуобуйа тэрилиннэ, ону кытта дьиэни туһаныыга куттал суох буолуута үрдээтэ», — диэн Сулустаан Заболоцкай чопчулаата.
Сиһилии: https://www.sakha.gov.ru/news/57965