«Дьокуускайдааҕы» ИДьМ сулууспатын 1 №-дээх полициятын дьуһуурунай чааһыгар Хатас сэлиэнньэтигэр баар маҕаһыын дьаһалтата сиэйпэттэн харчыны аһаҕастык уорбуттарын туһунан сайабылыанньа биэрбит. Уопсай материальнай хоромньу 123 000 солкуобайга тэҥнэспит.
Холуобунай ирдэбил үлэһиттэрэ ыыппыт үлэлэрин түмүгүнэн буруйдаах киһини быһаарбыттар. Ол ити маҕаһыыҥҥа уруккута үлэлээбит 23 саастаах кыыс буолара биллибит. Уорбаланааччы харчы сиэйпэҕэ харалла сытарын эрдэттэн билэр эбит. Кини маҕаһыын анал хоһугар киирэн харчыны уора турбутун атыыһыт көрбүт уонна эккирэтэ сатаабыт, ол эрээри кыыс куотан мүччү түспүт.
Уоруллубут харчыттан 70 000 солкуобайыгар кыыс тутатына арыгы атыылаһан, ыһа-тоҕо күүлэйдээбит. Оттон харчы ордубут сорҕотун полициялар булбуттар уонна төннөрбүттэр. Билигин Арассыыйа Федерациятын Холуобунай кодексатын 161-с ыстатыйатын 1 чааһынан («Халааһын» / «Грабеж») холуобунай дьыала тэрилиннэ. Бу ыстатыйанан буруйдаах киһи 4 сылга диэри көҥүлэ быһыллыан сөп, диэн ИДьМ пресс-сулууспата иһитиннэрэр.