«Центровуз. Истоки» пуорумҥа профессиональнай сайдыы былаһаакката тэрилиннэ. Өрөспүүбүлүкэ тутаах хампаанньалара эдэр исписэлиистэргэ бэйэлэрин бырагыраамаларын билиһиннэрдилэр. Былаһаакка спикердэрэ устудьуоннар ыйытыыларыгар, ол иһигэр стажировка уонна үлэҕэ киирии туһунан хоруйдаатылар.
—Өрөспүүбүлүкэ биһиги бастыҥ үөрэҕи ыларбыт туһугар сүҥкэн болҕомтотун уурар. Биһиги сорукпут — талааныҥ, билииҥ-көрүүҥ, күүһүҥ-кыаҕыҥ дойдугар, дьиэҕэр төннөн, Саха сирин сайыннарыыга үлэлээһини ситиһии, — диэн «АЭБ» персоналга дириэктэрэ Мотрена Николаева этэр.
Кини сайдыы тиһиктэрин билиһиннэрдэ: производственнай быраактыка, официальнай үлэҕэ стажировка уонна каадыр резервэтин бырагыраамата, ону таһынан үс карьернай трек: производственнай, тэхиньиичсэкэй уонна IT-хайысха.
—Хас биирдии эдэр исписэлиискэ уһуйааччы сыһыарыллар. Учуобунньукка суруллубут туспа, оттон ол олоххо хайдаҕын уопуттаах үлэһиттэр көрдөрөллөр. Ити үлэ куттала суох буолуутун, хаачыстыбатын хааччыйарга көмөлөһөр, — диэн Николаева санаатын үллэһиннэ.
«Сахатранснефтегаз» бэрэстэбиитэлэ Юлия Шайдулина тэрилтэ өрөспүүбүлүкэ туһугар үлэлииргэ бэлэм эдэр исписэлиистэри күүтэрин эттэ.
—Саха сиригэр эһиги кыаххытын олоххо киллэрэргэ бары усулуобуйа баар, — диэн тоһоҕолоон бэлиэтиир. » Центровуз. Истоки» ыччат пуорума Саха сиригэр от ыйын 31 күнүттэн атырдьах ыйын 1 күнүгэр диэри ыытыллар. Тэрээһиннэргэ устудьуоннар, выпускниктар уонна эдэр исписэлиистэр кытталлар. Сыала-соруга — үөрүйэҕи атастаһыы, саҥа көҕүлээһиннэри үөскэтии уонна биир дойдулаахтар, эрэгийиэн икки ардыларыгар сибээһи бөҕөргөтүү.
—Дойду бастыҥ үрдүк үөрэх кыһаларын талааннаах устудьуоннарын, эдэр исписэлиистэри, биир дойдулаахтар, диаспоралар бэрэстэбиитэллэрин кытта кэпсэтэртэн үөрбүтүм. Дьиэлэриттэн ыраах үөрэнэр, үлэлиир-хамсыыр дьон төрөөбүт Сахаларын сирин кытта сибээһи ыкса туталлара, сайдыытыгар кыттыахтарын баҕараллара сыаналанар. Пуорум хас биирдии кыттааччыга саҥа билиигэ, туһалаах билсиигэ уонна холбоһуктаах көҕүлээһиннэргэ аналлаах былаһаакканан буолар. Ылбыт үөрүйэхтэрэ, саҥа, сонун санаалар биһиги өрөспүүбүлүкэбит туһатыгар буоллунар, — диэн СӨ ыччат дьыалатын уонна социальнай алтыһыытын миниистирэ Петр Шамаев бэлиэтиир.
Сиһилии: https://www.sakha.gov.ru/news/58331
СӨ Ил Дарханын уонна Бырабыыталыстыбатын пресс-сулууспата
Хаартыскалар: Арсений Иванов, «Центровуз. Истоки» пуорум