Дьокуускай куоракка «Путь ВОИНа» диэн байыаннай-успуорт күрэһэ саҕаланна. Байыаннай күрэхтэһии икки күн, кулун тутар 27-28 күннэригэр ыытыллар. Саха сирин араас муннуктарыттан хомуллубут бастыҥ 10 хамаанда бэйэлэрин кыахтарын көрдөрүөхтэрэ, илин-кэлин түсүһэн бастыыр иһин күрэхтэһиэхтэрэ.
Тэрээһин «ВОИН» киин Саха сиринээҕи филиалын өйөбүлүнэн үрдүк таһымнаахтык ыытыллар. Судьуйа кэллиэгийэтин уопуттаах инструктор-методистар салайаллар. Кылаабынай судьуйанан киин педагог-психолога Василий Находкин буолар.
Бу байыаннай оонньууларга М.А.Алексеев аатынан Үөһээ Бүлүүтээҕи өрөспүүбүлүкэтээҕи лиссиэй-интернээт үрдүкү кылааһын үөрэнээччилэрэ кытта сылдьаллар. Салайааччылара Григорий Золоторев этэринэн, оҕолор бэйэлэрин кыахтарынан сөптөөхтүк дьарыктаммыттар. Ситиһиигэ эрэллээхтэр. Санатан эттэххэ, ааспыт сылга ыытыллыбыт бастакы Бүтүн Арассыыйатааҕы «Путь ВОИНа» байыаннай-тактическай күрэхтэһиигэ Саха сирин «Боотур» хамаандата бастаабыта. Кыайыылаах хамаандаҕа сүүмэрдээһини ааһан, Үөһээ Бүлүүттэн Любовь Михайлова ситиһиилээхтик кыттыбыта.
Күрэхтэһиигэ бэлэмнэниилэрин туһунан Үөһээ Бүлүү хамаандатын хапытаана Владдислав Борисов маннык кэпсиир:
— Мин М.А. Алексеев аатынан Үөһээ Бүлүүтээҕи өрөспүүбүлүкэтээҕи лиссиэй-интернээт 11-с кылааһын үөрэнээччитэбин. Бу күрэххэ биһиги бастакыбытын кытта кэллибит. Уопсайа 11-бит, биир саппаас киһилээхпит. Кэлээри сылдьан үс нэдиэлэ бэлэмнэннибит. Бүтэһик нэдиэлэҕэ үөрэхпититтэн көҥүллэтэн, тохтоло суох эрчилиннибит. Билиҥҥитэ күрэх үчүгэйдик ааһан иһэр. Саамай ыарырҕаппыппыт, гранатаны быраҕыы буолла. Дойдубутугар сылдьан эрчиллэрбитигэр гранаатаны быраҕыы үчүгэй курдук этэ, бүгүн мөлтөөн биэрдибит. Туох да буолбутун иһин кыайыыга эрэллээхпит. Эр киһи инники өттүгэр хаһан баҕарар, дурда-хахха, көмүскэл, тирэх буолар аналлаах. Онон маннык күрэхтэр, чуолаан, уолаттарга туһалаахтар дии саныыбын.
Санатар буоллахха «Путь воина» байыаннай-тактическай күрэхтэһии – эдэрдэри байыаннай дьыалаҕа уонна патриотизмҥа иитэр улахан таһымнаах күрэх. 2025 с. балаҕан ыйыгар «Боотур» хамаандата (Центр «ВОИН» курсаннара) Бүтүн Арассыыйатааҕы бастаан дойдуга Саха сирин ааттаппыттара. Биһиги оҕолорбут байыаннай дьыалаҕа таһыччы үрдүк бэлэмнээхтэрин Уһук Илиҥҥи федеральнай уокурукка боломуочуйалаах бэрэстэбиитэлэ, «ВОИН» киин кэтээн көрөр сэбиэтин бэрэссэдээтэлэ Юрий Трутнев бэлиэтээн турар.