Арассыыйа Бэрэсидьиэнэ Владимир Путин сорудаҕынан олоххо киирэр «Уһун уонна көхтөөх олох» национальнай бырайыак чэрчитинэн, ону тэҥэ Ил Дархан Айсен Николаев доруобуйа харыстабылын тиһигин сайыннарыы туһунан ыйааҕын чэрчитинэн тутуллубут Амма улууһун саҥа поликлиниката иккис ыйын үлэлиир.
Бүгүн манна хаачыстыбалаах мэдиссиинэ көмөтүн улуус олохтоохторо эрэ буолбакка, ыаллыы сытар улуустартан кэлбит ыарыһахтар эмиэ ылаллар.
«Олус үчүгэй балыыһа: сырдык, аныгы, киэҥ. Кылаабынайа, билигин эмчиттэр бары биир сиргэ көрдөрөллөр, эмтэнэллэр. Урут, холобур, педиатрия отделениета туспа дьоҕус дьиэҕэ баара, биир дьиэттэн атын дьиэҕэ сылдьарга күһэллэрбит. Билигин барыта быдан табыгастаах буолла. Оҕону да, тэҥҥэ бэйэҥ да көрдөрүөххүн сөп. Мин аны хас да бырааска сырыттым. Барытын олус сөбүлээтим», — диэн Амма олохтооҕо Николай Захаров кэпсээтэ.
Аныгы, киэҥ-куоҥ, бары тэрилинэн хааччыллыбыт поликлиника улуус олохтоохторугар эрэ буолбакка, Амма киин балыыһатын үлэһиттэригэр да күүтүүлээх бэлэҕинэн буолла. Үс этээстээх дьахталлар консультациялара, улахан дьон уонна оҕо регистратуралара, биэс куойкалаах күнүскү стационар, лаборатория, профилактика, суһал көмө уонна туспа исписэлиистэр кэбиниэттэрэ бааллар.
Тэрилтэни рентген-аппараатынан, стоматологическай установканан, УЗИ-аппараатынан, эндоскопическай, маммографическай уонна флюорографическай оборудованиенан хааччыйбыттар. Улууска аан бастаан эндоскопическай стойка уонна ЛОР-комбайн баар буолбуттар.