Ырыа күнүн көрсө бу күннэргэ Томпо улууһун Мэҥэ Алдан нэһилиэгин айар куттаах олохтооҕо Азия Комиссарова култуура салаатыгар үлэлээбитэ үбүлүөйдээх 20 сылын бэлиэтээри бэлэмнэнэр.
Бу туһунан Н.И. Колодезников аатынан Култуура дьиэтин дириэктэрэ, СӨ култууратын туйгуна, РФ култууратын бочуоттаах үлэһитэ Елена Степанова кэллиэгэтин туһунан сырдатта:
— Азия Комиссарова П.П. Колодезников аатынан муусука оскуолатыгар 2006 сылтан фольклор учууталынан үлэтин саҕалаабыта. Бу сыл кини С.Ф. Гоголев аатынан Дьокуускайдааҕы 1 №-дээх педагогическай кэллиэс алын кылааска эбии үөрэхтээһин муусука учууталынан үлэлии кэлбитэ. 2012 сыллаахха ХИФУ культуролог үөрэҕин бүтэрбитэ. 2018 сылаахха вокал идэтин баһылаабыта. Эстраднай ырыа кылааһыгар 2012 сылтан күн бүгүнүгэр диэри үлэлии сылдьар. Фольклордуун, ырыа кылааһынаан холбоон 8 выпуһу таһаарда. Үлэтин таһынан өр сылларга ыччат түмсүүтүн салайааччытынан үлэлээбитин түмүгэр, Мэҥэ Алдан ыччаттара элбэхтэ араас куонкурустарга кыайан, Туоһу уонна Махтал суруктары ылбытттара.
Азия Комиссарова нэһилиэгэр аҕыс сыл устата олохтоох дьаһалта дьокутаатынан талыллан үлэлии сылдьар. 2009 сыллаахха “Алаас ырыата — Күөрэгэй Куо» өрөспүүбүлүкэтээҕи бырайыакка Дьокуускай куоракка араас улуустан кыттааччы мустан, улахан кэнсиэр буолбута. Онно кини Томпо оройуонун аатыттан кыттыыны ылбыта. 2013 сыллаахха “Бастыҥ эбии үөрэхтээһин уһуйааччыта” оройуоннааҕы күрэскэ анал аат хаһаайкатынан буолбута. Мэҥэ Алданнааҕы Чараҥ ырыа бөлөҕүн кытары Москва куоракка баран ыллаан, кыайан кэлбиттэрэ уонна Италияҕа күрэскэ кыттарга ыҥырыы туппута.
2014 сыллаахха Италия Римини куоратыгар кыттан, эмиэ кыайан хотон кэлбиттэрэ. 2017 сыллаахха “Дьүрүскэн” бөлөх бастыҥ оҕо кэлэктиибин аатын ылбыта. 2018 сыллаахха Турцияҕа Анталия куоракка норуоттар икки ардыларынааҕы күрэскэ баран, 1-кы миэстэ ылан, үөрэн көтөн кэлбиттэрэ.
Билигин бүтэрээри сылдьар выпусниктара эмиэ олус ситиһиилээхтик биэс сыл үөрэннилэр, оройуоннааҕы, өрөспүүбүлүкэтээҕи күрэстэргэ ситиһиилэрэ олус элбэх. Быйылгы улахан ситиһиитэ “Якутия-24” ханаал тэрийэр “Вот это да!” диэн Оҕо телевизионнай ырыа күрэһигэр үөрэнэччитэ Эрчим Саввин ситиһиилэммитэ, финалга кыттыбыта.
2024 сыллаахха Амма улууһугар Олоҥхо ыһыаҕар бөлөҕүнэн толорууга “Кэскиллээх толорооччу” анал ааты ылбыта. Ити курдук, 2006 сылтан төрөөбүт нэһилиэгэр үлэлии сылдьар. Үс оҕо тапталлаах ийэтэ, хас күрэс, куонкурус, тэрээһин испэктээк буоллун, барытыгар көхтөөх кыттыыны ылар. Үөрэтэр оҕолорун араас тэрээһиннэргэ кытыннарар. Бу күннэргэ Азия Комиссарова 20 сыллаах айар киэһэтигэр урукку сыллардааҕы уостан түспэт ырыалары кэнчээри ыччатары, аҕам саастаахтары холбоон “Ыллаа, ырыа күнэ!” тэрээһини бэлэх уунаары сылдьар. Айар куттаах биир дойдулаахпытыгар Азия Комиссароваҕа ситиһии аргыстаах нус-хас олоҕу баҕарабыт!