Үөрэх саҥардыллыбыт федеральнай судаарыстыбаннай ыстандаартыгар сөп түбэһиннэрэн, төрөөбүт кыраай устуоруйатын үөрэтии оскуола бырагырааматын булгуччулаах чааһынан буолар. Бу саҥаны киллэрии үүнэр көлүөнэ бэйэтин норуотун, өрөспүүбүлүкэтин култууратын, устуоруйатын дириҥник өйдүүрүгэр аналлаах.
Былырыын балаҕан ыйын 1 күнүттэн Үөрэх уонна билим министиэристибэтэ “Төрөөбүт кыраай устуоруйата. СӨ 5-7 кылаас үөрэнээччилэригэр” үөрэх саҥа муодулун киллэрбитэ. Бу туһунан Үөрэх уонна билим министиэристибэтин пресс-сулууспата иһитиннэрэр.
С.Н. Донской II аатынан үөрэҕи сайыннарар уонна идэ таһымын үрдэтэр институт “Төрөөбүт кыраай устуоруйата. СӨ 5-7 кылаас үөрэнээччилэригэр” үөрэх саҥа кинигэтин электроннай көрүҥүн таһаарда. Г.Г. Решетников уонна Н.Н. Радченко ааптардар салайыыларынан тахсыбыт кинигэ үс чаастан турар. Учуобунньук Арассыыйа Үөрэҕириитин министиэристибэтин сакааһынан, СӨ Үөрэҕин уонна билимин министиэристибэтин сүрүннээһининэн таҕыста итиэннэ үөрэх кинигэлэрин федеральнай испииһэгэр киирэр. Матырыйааллары хронология бэрээдэгинэн таҥнылар – былыргы кэмтэн бүгүҥҥү күҥҥэ диэри уонна оскуола үөрэнээччилэригэр эрэгийиэн устуоруйаҕа сайдыытын, кини култууратын, уопсастыбаннай уратыларын туһунан кэлим өйдөбүлү иҥэрэр. Хас биирдии тиэмэ кэнниттэн бигэргэтэр ыйытыылардаах, ону тэҥэ, айар сорудахтардаах (бырайыактыыр үлэ, каартанан, уруһуйунан уонна тиэкиһинэн үлэ).
Институкка иһитиннэрбиттэринэн, кинигэ электроннай көрүҥэ тутулунан, ис хоһоонунан уонна уус-уран оҥоһуллуутунан бэчээтинэй таһаарыытыгар олоччу сөп түбэһэр, аныгы инструменнарынан эбэн-сабан биэрбиттэр. Учуобунньук оскуолаҕа туһанарга да, уруокка бэлэмнэнэргэ, төрөөбүт кыраай устуоруйатын бэйэ дириҥэтэн үөрэтиитигэр даҕаны аналлаах.
“Саха сирин устуоруйата – бу Арассыыйа устуоруйатын чааһа. Биһиги биир дойдулаахтарбыт Уһук Илини олохтооһуҥҥа сүҥкэн кылааттарын киллэрсибиттэрэ, Аҕа дойду Улуу сэриитигэр кыттыбыттара, бырамыысыланнас, тырааныспар, үөрэх, култуура сайдыытын төрүттэспиттэрэ. Үөрэнээччилэр кинилэр дьиэ кэргэттэрин, төрөөбүт кыраайдарын дьылҕата дойду олоҕун кытта өрүү ситимнээҕин өйдүүллэрэ суолталаах. Оҕолор бу утумнааһыны билэллэригэр, төрөөбүт дойдунан киэн туттууну үөскүүрүгэр туһаайыллар” – диэн кинигэ эппиэтинэстээх хос эрэдээктэрэ Гаврил Решетников бэлиэтиир.
Итини тэҥэ С.Н. Донской II аатынан үөрэҕи сайыннарар уонна идэ таһымын үрдэтэр институт саайтыгар “Төрөөбүт кыраай устуоруйата. Саха Өрөспүүбүлүкэтэ” куурус оробуочай бырагырааматын эмиэ босхо хачайдаан ылыахха сөп. Ону таһынан, атыыга учууталларга, преподавателлэргэ аналлаах тустаах куурус мэтэдиическэй босуобуйата эбэ баар.
Үөрэх кинигэлэрин сигэтэ: https://iroipk-sakha.ru/история-нашего-края-республика-саха-я/