«Түмсүү» норуот айымньытын киинигэр, Бороҕон нэһилиэгин «Тумулчаана» уһуйаан иитиллээччилэрин отчуоттуур кэнсиэрэ буолла.
Быйылгы «Ыллаа-туой, чөмчүүк саас!» кэнсиэр Арассыыйаҕа Норуоттар сомоҕолоһууларын сылыгар ананна уонна сандал сааһы көрсө ыытылынна. Медиапрезентациянан оҕолор ситиһиилэрин сырдаппыттарын бары сэргии көрдүбүт. Салгыы кырачааннар олус үчүгэйдик туттан-хаптан, толлубакка бииртэн биир үчүгэй ырыалары, бөлөҕүнэн араас үҥкүүлэри бэлэхтээтилэр. Иитээччилэр кэнсиэри көрө кэлбит оҕолорго оонньуулары ыыттылар.
Улууска ыытыллыбыт, оскуолаҕа киириэн иннинээҕи бэлэмнэнии бөлөҕүн оҕолоро Клавдия Ивановна Васильева бырайыагар «Көҥүл түһүлгэ» куонкурустарыгар ситиһиилээхтик кыттыбытарын бэлиэтиир наадалаах. Ол курдук, «Ахсаан дойдутугар айан» номинацияҕа Мамонтова Милана 1 миэстэ, «Хоннохтоох хоһоонньуттар» номинацияҕа Васильев Родион 1 миэстэ, «Нуучча тыла биһигинниин» номинацияҕа Макаров Всеволод 2 миэстэ, «Дорҕооннуун доҕордуубут» номинацияҕа Новикова Айыына 2 миэстэ, ону таһынан үҥкүүгэ, ох саанан ытыыга, саахымакка кыттаннар, хамаанданан уопсай түмүккэ Муҥутуур кыайыылаахтар» буолбуттара барыбытын үөрдэр.
Уһуйаан иитээччилэрэ, үлэһиттэр кырачааннарга билиини биэриигэ, талааннарын, дьоҕурдарын арыйыыга сүрүн болҕомтолорун уураллар. Кырачааннар ситиһиилэрэ өссө да үрдүккэ кынаттыы туруоҕа. Көрөөччүлэр бу кэнсиэри көрөн, олус астынан тарҕастыбыт.
Светлана Прудецкая, бибилэтиэкэр
Тумул, Уус Алдан.
Хаартыска: Светлана Прудецкая тиксэриитэ