Дьахтар эр киһини быһахтаабытынан полиция холуобунай дьыала тэрийдэ. Бу туһунан ИДьМ пресс-сулууспата иһитиннэрдэ.
Дьокуускай куоракка полиция 4-с нүөмэрдээх отделыгар быһаҕынан анньыллыбыт кырдьаҕас киһи балыыһаҕа киирбитин туһунан иһитиннэрии мэдиссиинэ тэрилтэтиттэн киирбит.
Суһал-ирдиир үлэ кэмигэр холуобунай ирдэбил үлэһиттэрэ ыар эчэтиини оҥорууга Мэҥэ Хаҥаластан төрүттээх, урут сууттана сылдьыбыт 57 саастаах дьахтар уорбаланарын быһаарбыттар. Дьахтар эмсэҕэлээччини кытары чугастык билсэр эбит.
Барыллаан быһаарыллыбытынан, дьахтар кыбартыыратыгар сылдьан «тапталлаахтар» күнүүлэһэн, айдаарсан турбуттар. Айдаан кэмигэр эр киһи дьахтар кэргэннээх сылдьан кинини кытары сибээстэспитиҥ диэн сирэй-харах анньыбыт. Онуоха дьахтар куукуна быһаҕынан эр киһитин көхсүгэр анньыбыт.
Туһааннаах быһылаанынан РФ Холуобунай кодексын 111 ыст. 2 ч. («Умышленное причинение тяжкого вреда здоровью») холуобунай дьыала көбүтүлүннэ.