Бүгүн, ыам ыйын 18 күнүгэр, Аан дойдутааҕы түмэл күнэ 49-с сылын бэлиэтэнэр.
Биллэн турар, бу күн араас суолталаах тэрээһиннэр ыытыллаллар. Быйыл саас муус устар саҥатыгар Чурапчы улууһугар командировкаҕа сылдьан, биир олус ураты үлэлээх-хамнастаах оскуолаҕа сылдьан турабын. Алаҕар орто оскуолатыгар киирээт, сырдык эйгэҕэ куустаран бараҕын. Сахалыы тыыннаах оҕо саас уйатын атын оскуолалартан тарбахха баттанар уратыта — үс түмэллээх. Буолаары буолан, хайдах курдук дириҥ ис хоһоонноох түмэллэрий! Бастакы түмэл — нэһилиэк устуоруйатын кэпсиир саала. Кыраайы үөрэтэр түмэли 60-с сылларга тэрийбиттэр. Ол кэнниттэн сыыйа нэһилиэккэ араас аахсыйалары тэрийэн, оҕолорунан нэһилиэк олохтоохторуттан былыргы эспэнээттэри хомуйтаран, кэҥэтэн испиттэр. Бу кыраайы үөрэтэр мусуой «Бөдөҥсүйүү » холкуос бэрэссэдээтэлэ, Алаҕар нэһилиэгэр Сэбиэт бэрэссэдээтэлинэн үлэлээбит Аҕа дойду Улуу сэриитин кыттыылааҕа, «Албан аат» 3-с истиэпэннээх, Аҕа дойду сэриитин 1-кы, истиэпэннээх уордьаннар кавалердара, нэһилиэгэр бастакы 4 кылаастаах оскуоланы астарбыт Гаврил Трофимович Протодьяконов аатын сүгэр.
Бу оскуола мусуойтарын бары истиэндэлэрин «Ректайм» тэрилтэҕэ оҥорторон, барыта уурбут-туппут курдук биир истиилинэн оҥоһуллубут. Киһи саамай сөҕөрө — нэһилиэк тэриллиитин былыргы каартатын уруһуйа кытта баар. Бу маны энтузиаст-салайааччы Гаврил Протодьяконов бэйэтэ уруһуйдаабыт. Аны нэһилиэк Аҕа уустарын испииһэгэ туспа истиэндэҕэ ыйанан турара — олох киһи махтаныах эрэ тустаах. Араас түмэлгэ сырыттым да, бу маннык ис хоһоонноох истиэндэни аан бастаан көрөбүн!
Онон уопут атастаһарга бэртээхэй тиэмэ. Аны оскуола оҕотун иитэр үлэҕэ суолтата тугунан да кэмнэммэт. Оҕо төрөөбүт нэһилиэгин устуоруйатын буолбакка, төрүччүтүн, чугас аймаҕын, төрөппүттэрин аҕа уустарын билэ улаатар.
Алаҕар нэһилиэгин оскуолатын түмэллэрин оҥорууга 38 сыл педагогическай ыстаастаах, 17 сыл завуһунан, 4-с сылын оскуола дириэктэринэн үлэлиир Валентина Максимова улахан үлэни ыыппыт. Онон кини миигин сиһилии билиһиннэрэн, бу хас биирдии түмэлтэн бэрт элбэххэ үөрэнэн таҕыстым уонна дьоҥҥо-сэргэҕэ кэпсээн, бу маннык түмэллэр өрөспүүбүлүкэҕэ элбии туралларыгар баҕалаах анаан сырдатыам.
Киһи бу оскуолаттан бэрт элбэх үөрэнэр бастыҥ холобурдаах.