СӨ Судаарыстыбаннаһын күнүгэр сөп түбэһиннэрэн ыытыллар, үгэскэ кубулуйбут Быһа эпиир кэмигэр Ил Дархан Айсен Николаев икки сыллааҕыта, 2023 сыл балаҕан ыйын 28 күнүгэр илии баттаммыт «Дьадайыыны утары охсуһар миэрэлэр тустарынан» ыйаах олоххо киириитин түмүктэрин таһаарда.
«Дьадайыыны утары охсуһуу биһиги өрөспүүбүлүкэбит бэлиитикэтин биир сүрүн соругунан буолар, инники күөҥҥэ сылдьар», — диэн бэлиэтээтэ Айсен Николаев.
Өрөспүүбүлүкэ аҕа баһылыга 2018 сылга дьадайыы көрдөрүүтэ 18,2% этэ, оттон 2024 сыл бүтүөр диэри бу көрдөрүү 12,8% диэри намтаабытын санатта. Ыйаахха этиллэринэн, 2030 сылга диэри дьадайыы таһымыттан намыһах дохуоттаах нэһилиэнньэ ахсаанын 7,6% диэри түһэрэр сорук туруоруллар.
«Билигин 128 000 кэриҥэ киһи дьадайыы таһымыттан аллараа кэрдиискэ олорор. «Бу кыһалҕа материальнай миэрэлэринэн эрэ быһаарыллыбат, бырабыыталыстыба, биисинэс уонна гражданскай уопсастыба күүстэрин түмэр кэлим ньыма наада», — диэн Айсен Николаев тоһоҕолоото. Үлэ сүрүн хайысхаларынан доруобуйа харыстабылын өйөөһүн, оҕолоох дьиэ кэргэттэргэ көмө, хат үөрэттэрии, үлэнэн хааччыйыы көмөтүн ааттаата.
Өрөспүүбүлүкэҕэ ыытыллар бары үлэни-хамнаһы сүрүннүүр бырайыактыыр офис бырабыыталыстыба бэрэссэдээтэлин солбуйааччы Георгий Степанов салайааччылаах, тэриллибитэ.
Пилотнай бырайыак чэрчитинэн, элбэх оҕолоох 1000-тан тахса ыал кэлим өйөбүлү ылар, ол иһигэр дьиэ кэргэттэргэ социальнай-экономическай боппуруостары быһаарарга көмөлөһөр тус сүбэһиттэр үлэлииллэр.
Ил Дархан олоххо киирэн эрэр бырагыраамалар ситиһиилээх буолалларыгар эрэнэрин биллэрдэ уонна дьадайыыны салгыы аҕыйатыыга бары уопсастыбаннай күүстэри түмэргэ ыҥырда.
«Төһөнөн дьадаҥы дьон аҕыйах да, соччонон уопсастыбаҕа олох хаачыстыбата үрдүк. Бары дьадайыыттан куоталларыгар көмөлөһүөхтээхпит», — диэн Айсен Николаев түмүктээтэ.
Сиһилии: https://www.sakha.gov.ru/news/12638