Саха сирин Ил Дархана Айсен Николаев Саха сирин сайдыытын корпорациятын саҥа функцияларын туһунан ыйаахха илии баттаата. Корпорацияны билигин өрөспүүбүлүкэ СӨ инновацияҕа, сыыппара сайдыытыгар уонна инфокоммуникационнай технологияларга миниистиринэн үлэлиир Василий Ефимов салайыаҕа. Бу туһунан Ил Дархан балаҕан ыйын 27 күнүгэр быһа эпииргэ эттэ.
«Мин корпорация сырьёта суох экэниэмикэҕэ үбү тардыыга, биһиги өрөспүүбүлүкэбит хампаанньаларын капитализацияларын үрдэтиигэ уонна энергосервиснай хампаанньаларга үбү тардыыга сүрүн тэрилтэ буолуоҕун туһунан соругу туруордум. Бу өрөспүүбүлүкэ бүддьүөтүн чэпчэтиэҕэ», — диэн Айсен Николаев эттэ.
«Билигин биһиэхэ хас даҕаны судаарыстыбаннай тэрилтэ баар, кинилэр, мин санаабар, олус үчүгэйдик бэйэлэрин көрдөрбөтүлэр. Бу инвестицияны тардыы ааҕыныстыбата уонна Экспорты өйүүр киин. Кинилэр функцияларын корпорацияҕа биэриэххэ сөп. Оччоҕо бүддьүөттэн лаппа кыра ороскуоту ылыа уонна туруоруллубут соруктары үрдүк таһымнаахтык олоххо киллэриэ диэн эрэнэбин», — диэтэ Айсен Николаев.
Билигин каадыр боппуруоһа быһаарылла сылдьар, оттон салайааччынан билиҥҥи инновация миниистирэ Василий Ефимов буолуоҕа.
«Кини салайыытынан биһиги өрөспүүбүлүкэбит креативнай экэниэмикэҕэ баар бары ситиһиилэри бигэтик тутуохпут уонна киһи хапытаалын сайдыытын өттүгэр өрөспүүбүлүкэбитигэр олус наадалаах саҥа технологическай ситиһиигэ тахсарга улахан хардыыны оҥоруохпут диэн эрэнэбин», — диэн Ил Дархан эттэ.