Арассыыйаҕа кулун тутар 1 күнүттэн ыла суоппар быраабыгар үөрэнии саҥа быраабылалара күүстэригэр киириэхтэрэ. Манна суол быраабылатыгар (ПДД) киирбит бүтэһик уларыйыылар учуоттаннылар. Бу туһунан Судаарыстыбаннай Дуумаҕа «Единая Россия» фракциятын дьокутаата Алексей Говырин иһитиннэрдэ.
«Быраапка үөрэнии саҥа быраабылата кулун тутар 1 күнүттэн күүһүгэр киирэр. Бэлэмниир, хаттаан бэлэмниир уонна квалификацияны үрдэтэр 47 холобур бырагыраама бигэргэтилиннэ. Суол быраабылатын уларыйыылара уонна суол быһылааныгар бастакы көмөнү оҥоруу бэрээдэгэ учуоттаннылар, ыраахтан олорон үөрэтэр технологиялары туһаныы уонна массыынаны ыытыы чааһын элбэтии көрүлүннэ», — диэн Говырин «РИА Новости» ааҕыныстыбаҕа эттэ.
Авто-оскуолалар бэйэлэрин бырагыраамаларын саҥа ирдэбилгэ сөп түбэһиннэрэллэригэр биир нэдиэлэ курдук кэм хаалла. Ол эрээри, кулун тутар 1 күнүгэр диэри үөрэнэ киирбиттэр эргэ быраабыланан салгыы үөрэниэхтэрэ.
Арассыыйа Үөрэҕирии министиэристибэтэ суоппардары бэлэмниир бырагыраамаҕа уларытыы киллэрэр туһунан бирикээһи 2025 сыл сайыныгар бэлэмнээбитэ. Бу массыына ыытааччылары кытта ситимнээх бүтэһик уларыйыы буолбатах. Маны таһынан, Арассыыйаҕа 2027 сыл кулун тутар 1 күнүттэн ыла мэдиссиинэҕэ хааччах баар буоллаҕына, суоппар быраабын суох оҥоруохтарын сөбүн туһунан 360.RU иһитиннэрэр.