Кэбээйи улууһун Ньидьили нэһилиэгэр Арассыыйаҕа Норуоттар сомоҕолоһууларын, Саха сиригэр Култуура, улууспутугар Олоҥхо сылларын аһыы үөрүүлээх күнүгэр «Бары бииргэ!» диэн нэһилиэкпит талааннаах дьоннорун кэнсиэрэ буолан ааста.
Сылбыт үөрүүлээх аһыллыытынан нэһилиэк баһылыга Айыл Седельников эҕэрдэлээн туран, Саха Өрөспүүбүлүкэтин уонна Кэбээйи улууһун улахан наҕараадаларын туттарда. Улууспутугар соҕотох эр дьон ансаамбылын салайааччытыгар, СӨ култууратын үтүөлээх үлэһитигэр Иван Васильевич Ивановка Култуура министиэристибэтин махтал суругун, Федор Николаевич Дмитриевка «Бастыҥ тириэньэр — 2025» диэн Кэбээйи улууһун физкултуураҕа уонна успуорка сайдыытын иһин бэлиэни, сэртипикээти туттарда.
Кэнсиэргэ «Дьиэрэй» дьахталлар, «Ньидьили уолаттара» эр дьон ансаамбыллара, «Ньургуһун» үҥкүү бөлөҕүн толоруулара, маны таһынан биирдиилээн сцена бэтэрээннэрэ Мария Дмитриева, Иннокентий Эверстов, Дария Кондакова ырыалара, көрү-күлүүнү толорооччулар Екатерина, Ирина Эверстовалар уонна оҕолорбут олоҥхону бөлөҕүнэн ааҕыылара көрөөччүлэр сэҥээриилэрин ылыахтарын ыллылар.
Кэнсиэртэн киирбит үп-харчы сайын Олоҥхо Ыһыаҕар нэһилиэкпит түһүлгэтин тэрээһинигэр ыытыллыаҕа.
Альбина Ноговицына.