Кулун тутар 1 күнүттэн оҕо босуобуйатын анааһын бэрээдэгэ уларыйар. Чуолаан, оҕолоох ыалларга биир кэлим босуобуйаны оҥотторууга алимены ааҕыы саҥалыы барар буолуоҕа.
Билигин социальнай көмүскэл уорганнара алимены ааҕалларыгар МРОТ-унан (үлэ төлөбүрүн алын кээмэйинэн) буолбакка, орто хамнаһынан көрөр буолуохтара. Бу босуобуйа кээмэйигэр уонна ананарыгар дьайыан сөп. Бу туһунан Судаарыстыбаннай Дуума дьокпутаата Алексей Говырин ТАСС иһитиннэрдэ.
Кини быһаарбытынан, урут ыалга алимент туһунан суут быһаарыыта эбэтэр нотариустаах дуогабар суох буоллаҕына, социальнай көмүскэл үлэһиттэрэ ону МРОТ кээмэйинэн суоттууллара.
«2026 сыл кулун тутар 1 күнүттэн уларыйыы сүрүн төрүөтэ — эрэгийиэҥҥэ үлэ орто хамнаһа. Үгүстэригэр орто хамнас МРОТ-тааҕар (27 093 солк.) быдан үрдүк, онон уратыта биллэр буолуоҕа», — диэтэ дьокутаат.
Ол аата ыал дохуотун ааҕалларыгар улахан сыыппараны ылыахтара, онон сорох дьоҥҥо босуобуйа анамматын курдук дьайыан сөп. Ол эрэн, биир кэлим босуобуйа ааҕыллар бэрээдэгэ уларыйдаҕына да, дьиҥнээх төлөнөр алимент суумата уларыйбат диэн Говырин эбэн эттэ.
Өссө биир уларыйыы — билигин үлэлиир кыахтаах дьиэ кэргэн хас биирдии чилиэнэ ааҕыллар кэмҥэ (12 ыйга) 8 МРОТ-тан итэҕэһэ суох бигэргэтиллибит дохуоттаах буолуохтаах. Манна инбэлииттэр, биэнсийэлээхтэр уонна атын сорох категория дьон киирбэттэр (кинилэргэ ирдэммэт).