Саха суругунан литературатын төрүттэспит суруйааччы Анемподист Софронов-Алампа бииргэ төрөөбүт убайа Василий Иванович Софронов 1882 сыллаахха төрөөбүтэ. Ол эбэтэр, быраатыттан 4 сыл эрэ аҕа эбит.
Чурапчы народнай училищетын, Дьокуускайга реальнай училищены бүтэрбитэ. 1904 сыллаахха Кириэс-Халдьаайыга тиийэн, саҥа оскуоланы арыйбыта, оскуола дьиэтин туттарбыта. Чычымах, Чөркөөх, Чурапчы, Ытык Күөл оскуолаларыгар учууталлаабыта.
Василий Иванович норуотун иннигэр оҥорбут биир улахан үтүөтэ — быраатын, улуу суруйааччы Анемподист Софроновы иитэн-такайан таһаарбыта буолар. Оскуола паартатыгар икки эрэ сыл үөрэммит быраатын Кириэс-Халдьаайыга илдьэ тахсан, үс сыл дьиэтигэр олордон, үөрэппитэ, сайыннарбыта, бэйэтин холобурунан айар үлэ аартыгар үктэннэрбитэ.
Кэлин куоракка үөрэнэ киирбитин кэннэ, бэйэтин доҕотторун кытта билиһиннэрбитэ, аһын-үөлүн мэлдьи ыыта олорбута.
Блокнокка, тэтэрээккэ суруйбут элбэх дьүһүйүүлэрин, кэпсээннэрин аахтахха, ааптар айар дьоҕурдаах, киэҥ билиилээх, дириҥ өйдөөх, демократтыы көрүүлээх киһи быһыытынан көстөр.
Василий Иванович Софронов 1928 сыллаахха өлбүтэ.
«Саха уран суругун эйгэтигэр умсулҕаннаах айан» кинигэттэн.