Муус устар 1 күнүттэн сэлиэһинэй бурдугуттан оҥоһуллар үрүҥ килиэпкэ саҥа ГОСТ (судаарыстыбаннай ыстандаарт) киириэҕэ. Бу туһунан Росстандарт докумуонугар олоҕуран РИА Новости иһитиннэрэр.
Докумуон эргэрбит нуормалары саҥардар соруктаах уонна оҥорон таһаарааччыларга бородууксуйа тас көрүҥүгэр уонна ыйааһыныгар ордук киэҥ көҥүлү биэрэр. Саҥа ыстандаартка олоҕуран, маҕаһыыннарга түөрт муннуктаах эрэ буолбакка, сымыыт (овальнай) быһыылаах килиэптэр эмиэ баар буолуохтарын сөп. Ону таһынан, килиэп саамай кыра ыйааһынын кытаанах хааччаҕын тохтотор. Эрдэ бэлэм бородууксуйа ыйааһына 0,5 кг итэҕэһэ суох буолуохтаах эбит буоллаҕына, билигин оҥорооччулар атыылаһааччы наадыйыытыгар олоҕуран, кыра ыйааһыннаах килиэби оҥорон таһаарыахтарын сөп.
Саҥа ирдэбилинэн килиэби бытархай атыыга таһаарар болдьох туһунан этии уһулунна (эрдэ буһарыллыбыт кэмиттэн 24 чаас этэ). Ол эрээри, бородуксуйа оһохтон хостонуоҕуттан ыла тэрилтэҕэ сытар кэмэ, уруккутун курдук, 10 чаастан ордуо суохтаах. Саҥардыллыбыт ГОСТ-ка көҥүллэнэр килиэп испииһэгэ сиһилии сурулунна. Сүрүн састаабыгар килиэп буһарыыга сэлиэһинэй бурдук (үрдүкү, бастакы эбэтэр иккис суортаах), уу, туус, саахар уонна доруоһа хаалаллар. Ол гынан баран, докумуон хас даҕаны ас эбиискэтин, ол иһигэр антиокислителлэри уонна ферменнээх препараттары туһанары көҥүллүүр. Маны тус-туспа да, эбэтэр нормативнай докумуоннарга сөп түбэһэр комплекснай эбиискэ быһыытынан да туттуохха сөп. Саҥа ГОСТ 1986 сылтан туһаныллыбыт ирдэбили солбуйуоҕа. Бу норуоттар икки ардыларынааҕы нуормалар саҥардыллыбыт барылларын быһыытынан оҥоһулунна.
Дойду үрдүнэн ГОСТ-тар үгүстэрэ баҕа өттүнэн толоруллалларын бэлиэтиэххэ наада. Ол классическай ырысыаптан бородуксуйаны таһаарыан баҕалаах оҥорооччуларга ыйынньык буолар.
Санаттахха, бу иннинэ Дьокуускайдааҕы килиэп кэмбинээтэ дьон сөбүлүүр «Пшеничнай» уонна «Дарницкай» килиэптэрин ыйааһынын 700-650 кыраамтан 550 кыраамҥа диэри кыччаппыта. Ону таһынан, бурдук, хомунаалынай өҥө уонна логистика сыаната ыараабытынан сибээстээн, тэрилтэ кууһунан атыы сыанатын 4-7% үрдэтэрин туһунан биллэрбитэ.