Арассыыйа үтүөлээх маастара, биир дойдулаахпыт Владимир Балынец Грузияҕа буола турар Европа чөмпүйэнээтигэр ситиһиилээхтик кытынна.
Кини пауэрлифтиҥҥа дойду сүүмэрдэммит хамаандатын састаабыгар киирэн, боруонса мэтээли ылла. Бу туһунан Сүүмэрдэммит хамаандалары успуорка бэлэмниир өрөспүүбүлүкэтээҕи киин иһитиннэрдэ. Күрэхтэһии Тбилиси куоракка ыытыллар, манна континен бастыҥ күүстээхтэрэ муһуннулар.
Саха сирин күрэчитэ 54 кг диэри ыйааһыннаахтарга күөн көрүстэ. Владимир сытан эрэ штанганы анньыыга 166 киилэни баһылаан, үрдүк таһымнааҕын өссө төгүл дакаастаата уонна успуорка карьератыгар эбии ситиһиини оҥордо.