Ол туһунан бүгүн барыллаан куоластааһыны ыытыыга эрэгийиэннээҕи тэрийэр кэмитиэт бастакы мунньаҕар биллэрдилэр.
Кэмитиэт састаабыгар өрөспүүбүлүкэ биллэр уонна аптарытыаттаах дьоно, уопсастыбаннай уонна ыччат тэрилтэлэрин, сонуну киэҥник тарҕатар ситимнэр бэрэстэбиитэллэрэ, урбаанньыттар, байыаннай дьайыы кыттыылаахтара киирдилэр.
Кулун тутар 11 күнүттэн саҕалаан, баҕалаахтар бары хандьыдаат быһыытынан регистрацияланыахтарын уонна pg.er.ru саайт нөҥүө сайаапкаларын биэриэхтэрин сөп. Регистрация судургу уонна табыгастаах, тус чахчыларга куттал суох буолара мэктиэлэнэр.
Барыллаан куоластааһыҥҥа хандьыдаатынан Арассыыйа Федерациятын 21-тэн үөһээ саастаах олохтооҕо, баартыйата суохтары киллэрэн туран, буолуон сөп. Урут сууттана сылдьыбыт, омук гражданстволаах эбэтэр омук сиригэр бааҥҥа ууруулаах дьон хандьыдаат буолбаттар. Хандьыдааты туруоруу муус устар 30 күнүгэр диэри ыытыллар.
Салгыы Судаарыстыбаннай Дуумаҕа дьокутаакка хандьыдаат ким буоларын быыбардааччылар талаллар. Быыбардааччылар эмиэ муус устар 20 күнүттэн ыам ыйын 29 күнүгэр диэри порталга регистрацияланыахтаахтар. Хандьыдааттарга куоластааһын ыам ыйын 25-30 күннэригэр ыытыллар.
Хандьыдааттары куонкуруһунан талыы -– «Биир ньыгыл Арассыыйа» үгэһэ. Бу эрэ баартыйа бары таһымнаах быыбардарга барыллаан куоластааһыны, эбиитин күрэстэһэр төрүөккэ, ыытар. Хандьыдаатынан талыллыахтаах дьон бэйэ-бэйэлэрин кытары аһаҕастык күрэстэһэллэр. Хас биирдии быыбардааччы баартыйа кыаҕар дьайар кыахтанар.
“Биһиги өрөспүүбүлүкэ дьонун барыллаан куоластааһыҥҥа көхтөөхтүк кытталларыгар ыҥырабыт. Бу — дьоһуннаах хандьыдааттары таларга дьэҥкэ мэхэньиисим. Хас биирдии куолас улахан суолталаах», -– диэн «Биир ньыгыл Арассыыйа» баартыйа эрэгийиэннээҕи отделениетын исполкомун бэрэссэдээтэлэ Надежда Селютина иһитиннэрдэ.