Арассыыйаҕа Норуоттар сомоҕолоһууларын, Саха сиригэр Култуура сылларын чэрчитинэн, сандал саас маҥнайгы кэрэ бырааһынньыгын көрсө Суотту нэһилиэгэр «Түһүлгэ» сынньалаӈ киинигэр ис сүрэхтэн тахсар истиҥ, олус сэргэх тэрээһиннэр дьону-сэргэни кэрэ эйгэҕэ түмэн, сааскы сылаас сыдьаайы, үөрүүнү сандаартылар.
Кулун тутар 5 күнэ.
«Сандал саас күлүмнүүр уоттара» — Суотту орто оскуолатын иһинэн үлэлиир тустуу салаатын интэринээтин иитиллээччилэрин, интэринээт иллээх үлэһиттэрин кэнсиэрэ, өрө көтөҕүллүүлээх ырыалара, имигэс үҥкүүлэрэ көрөөччү кутун-сүрүн тутуон туттулар.
Өрөспүүбүлүкэ араас улууһуттан үөрэнэ, эрчиллэ сылдьар уолаттар күн күбэй ийэлэригэр тапталларын, интэринээттэрин үлэһиттэригэр махталларын туоһулуур чоҕулуччу көрбүт харахтара, кырдьык да, сандал саас күлүмнүүр уоттарын туоһутунан буолан сүрэхпитин сылаанньытта.
Кулун тутар 7 күнэ.
«Удьуор ситимэ сандал сааһы бары бииргэ».
Үс ини-бии бииргэ төрөөбүттэр: Василий Николаевич Черкашин, Розалия Николаевна Бубякина, Татьяна Николаевна Портнягина оҕолоро, сиэннэрэ, хос сиэннэрэ чахчы да удьуор ситиминэн киэркэйбит, дьоһун тыыннаах, сылааһынан саҕыллар ураты кэнсиэри бар дьонноругар бэлэх ууннулар.
Көлүөнэ ыччат чаҕылхай талаана удьуор ситимэ салҕана, үүнэ-сайда турарын кэрэһэлиир.
Киэҥ саала сэргэх көрөөччүлэрин уостубат ытыстарын тыаһа, эҕэрдэлэрэ үс бииргэ төрөөбүттэр удьуордарын ситимэ кэм-кэрдии туоһута буолан, сардаҥалаах аартыктара арылла туруохтун.
Кулун тутар 10 күнэ.
«Тыл күүһүнэн олоҕу үйэтитэн…»
Олохтоох ааптар, СӨ Суруйааччыларын сойууһун чилиэнэ, поэтесса, суруналыыс, айанньыт Акулина Иванова- Бээрийэ кыыһа Хотойук Айгыына айар түһүлгэтин биэчэрэ бэрт ураты тыыннаах эйгэҕэ дьонун-сэргэтин түмтэ. Айар үлэтин, айаннарын хаартыска быыстапкатынан сэһэргээһинэ, хоһоон эйгэтигэр ыалдьыттааһын, корсүһүүнү С. С. Егорова-Кынаттаах, тойуксут, ырыаһыт Любовь Каратаева, баһылык солбуйааччыта Н.Г. Черкашина, «Кустук» уһуйаан Ил Ииһэ Хойоҥдо Саһылыкаан, нэһилиэк бибилэтиэкэлэрин, култуура үлэһиттэрин эҕэрдэлэрэ, анаарыылар биэчэр ис хоһоонун ситэрэн-хоторон биэрдилэр.
Бээрийэ кыыһа Хотойук Айгыына айымньылара, билиҥҥии кэми ситэрэн-хоторон суруйуута долгутта, сэҥээртэ.
Тэрээһин кыттыылаахтара кэрэ түгэн бэлэхтээбитигэр махтанан туран, айымньылаах аартыктара аһылла, силигилии турарыгар баҕа санааларын эттилэр.
Е. ГОГОЛЕВА, «Түһүлгэ» СК салайааччыта