Бүгүн Дьокуускайга Бүтүн Арассыыйатааҕы “Саха тылын, литэрэтиирэтин бастыҥ учуутала-2026” күөн күрэс өрөспүүбүлүкэтээҕи түһүмэҕэ түмүктэннэ. Муҥутуур кыайыылааҕынан Уус Алдан улууһун Лөгөй лиссиэй-интэринээтин саха тылын, литэрэтиирэтин учуутала Валентина Тищенко таҕыста. Өрөспүүбүлүкэ аатыттан Бүтүн Арассыыйаҕа кыттар чиэстэннэ.
Кулун тутар 11-13 күннэригэр С.Н.Донской-II аатынан Үөрэҕи сайыннарар уонна идэ таһымын үрдэтэр институкка тыҥааһыннаах күөн күрэс буолла. Саха сирин 13 улууһуттан, улуустааҕы түһүмэххэ бастаабыт 13 педагог Дьокуускай куоракка кытта кэлбитэ.
Тэрийээччилэр бэлиэтииллэринэн, сыллата күөн күрэскэ саҥа ааттар тахсаллар, төрөөбүт тыл учууталларыгар аналлаах идэ сүрүн былаһаакката буоларын бигэргэтэллэр.
“Күөн күрэс саха тылын, литэрэтиирэтин учууталларыгар хас биирдии педагог саҥа идиэйэни булар, соругун быһаарар, бастыҥнары кэтээн көрөр инновационнай былаһааккатынан буолаар. Быйыл олус күүстээх учууталлары көрдүбүт. Кыттааччылар долгуйаллара, ол эрээри, бары оскуолаларын, улуустарын дьоһуннаахтык көрдөрдүлэр. Кинилэр бастыҥ, аныгы учуутал буолалларын итэҕэттилэр” – диэн Үөрэҕи сайыннарар уонна идэ таһымын үрдэтэр институкка бэлиэтээтилэр.
Күөн күрэс олоҕурбут көрүҥүнэн ыытыллыан быдан инниттэн саҕаламмыта. Кэтэхтэн түһүмэххэ дьүүллүүр сүбэ кыттааччылар “Медиавизиткаларын” – педагогтар сситиһиилэрин таһынан, тус педагогическай философияларын билиһиннэрэр үс мүнүүтэлээх видеонан роликтарын сыаналаабыттара. Салгыы “Профессионал-учуутал”, аһаҕас уруок, кылаас чааһа, “Уһуйааччы учуутал”, маастар-кылаас, Үөрэх уонна билим министиэристибэтин бэрэстэбиитэллэрин кытта сэһэргэһии курдук тургутуулары аастылар.
Бу түһүмэхтэри барытын ааһан, дьүүллүүр сүбэ бастыҥынан Лөгөй лиссиэй-интэринээтин учуутала Валентина Тищенконы ааттаата. Кини уруоктара уонна мэтэдиическэй ураты, саҥа ньымалара дириҥ суолталааҕынан, ис киирбэҕинэн эспиэртэри сөхтөрдө.
Ураты бэлиэнэн эспиэртэр ааттарыттан – ааспыт сыллардааҕы муҥутуур кыайыылаахтартан анал бириэмийэ буолла. Аан бастакытын олохтоммут наҕарааданы Валентина Тищенкоҕа туттардылар. Бу биир идэлээхтэрэ кини үлэтин үрдүктүк сыаналааабыттарын туоһулуур.
Муҥутуур кыайыылаах аны Саха сирин педагогическай түмсүүтүн аатыттан күөн күрэс Бүтүн Арассыыйатааҕы түһүмэҕэр кыттыаҕа.
Бу туһунан Үөрэх уонна билим министиэристибэтин пресс-сулууспата суруйар.
