Кулун тутар 31 күнүттэн муус устар 10 күнүгэр диэри Саха сиригэр Ил Дархан саахымакка төрдүс Куубага буолуоҕа. Быйылгы үрдүк таһымнаах күрэхтэһии саахымат хамсааһына 100 сылыгар ананар.
Тэрээһин Арассыыйа бэрэсидьиэнэ Владимир Путин көҕүлээбит «Арассыыйа успуорда» федеральнай судаарыстыбаннай бырагыраама сыалларын уонна соруктарын толорууга туһуланар.
2026 сылга улахан успуорка тэрээһин Бүтүн Арассыыйатааҕы статустаах түөрт турниры бииргэ түмүөҕэ: эр дьоҥҥо саахымакка Арассыыйа Кууубагын түһүмэҕэ, блиц, түргэн саахымат (рапид) күрэхтэһиилэрэ, ону таһынан быйыл бастакытын — саахымат композицияларын суоттааһыҥҥа турнир.
«Саха сирин Ил Дарханын саахымакка төрдүс Куубага өрөспүүбүлүкэҕэ саахымат хамсааһына 100 сылыгар анаммыта — биһиги эрэгийиэммитигэр олус суолталаах түгэн. Бүгүн Саха сиригэр 9 тыһыынча кэриҥэ киһи саахыматынан дьарыктанар, уонна маннык үрдүк таһымнаах турнирдар оҕо-ыччат успуорда сайдарыгар күүстээх тирэх буолаллар. Куубак успуорт сэргээччилэригэр чаҕылхай бырааһынньык буолуоҕар уонна инники чөмпүйүөннэр саҥа ааттарын арыйыаҕар бигэтик эрэнэбин», — диэн өрөспүүбүлүкэ Ил Дархана, «Биир ньыгыл Арассыыйа» баартыйа Саха сиринээҕи салаатын сэкиритээрэ Айсен Николаев бэлиэтээтэ.
Күрэхтэһии географията кэҥээтэ — оонньуулар үс былаһааккаҕа — Өктөм сэлиэнньэтигэр, Аллараа Бэстээх бөһүөлэгэр уонна Дьокуускай куоракка буолуохтара. Маннык саахыматы улахан нэһилиэнньэлээх пууннарга эрэ буолбакка, тыа сирдэригэр эмиэ киэҥник тарҕатарга, интеллектуальнай успуорт көрүҥүн сэргээччилэр киэҥ эйгэлэрин хабарга көмөлөһүөҕэ.
Турнирдарга норуоттар икки ардыларынааҕы алта гроссмейстер кытталларын бигэргэттилэр. Кинилэр ортолоругар ааспыт сыллар кыайыылаахтара бааллар: 1998 с. Бүтүн аан дойдутааҕы саахымат Олимпиадатын кыайыылааҕа, Арассыыйа сүүмэрдэммит хамаандатын састаабыгар аан дойду чөмпүйүөнэ (1997), биллиилээх тириэньэр уонна теоретик, СӨ Ил Дарханын Куубагын 2025 с. кыайыылааҕа Вадим Звягинцев (Москва) уонна уолаттарга Европа чөмпүйэнээтин үрүҥ көмүс призера (1996), оҕолорго Олимпийскай оонньуулар кыайыылаахтара (1998), уолаттарга Арассыыйа чөмпүйүөнэ (1999), Арассыыйа Куубагын түһүмэхтэрин 15 төгүллээх кыайыылааҕа, СӨ Ил Дарханын Куубагын 2024 с. кыайыылааҕа Дмитрий Кокарев (Свердловскай уобалас). Сиһилии кэлэр күрэхтэһиилэр тустарынан турнир саайтыгар билсиэххэ сөп: https://cup.sakhachess.ru/.
СӨ Ил Дарханын Куубага «Полюс», АЛРОСА, «РНГ» АО, «Селигдар» ПАО, Газпромбанк, «Алмазы Анабара» АО, «Арктик Капитал» ХЭУо, «Сахатранснефтегаз», УТУМ+ хампаанньалар үп-харчы өттүнэн өйөбүллэринэн ыытыллар.
Тэрийээччилэр — РФ Успуорка министиэристибэтэ, СӨ Физкултуураҕа уонна успуорка министиэристибэтэ, Арассыыйатааҕы Саахымакка федерацията, СӨ Саахымакка федерацията, СӨ Кэлэр көлүөнэ тус сыаллаах пуондата, Кэлэр көлүөнэлэр пааркалара уонна СӨ Национальнай уус-уран түмэлэ.