Быйылгы сылга судаарыстыбаннай пуонда филиалыгар 7 тыһыынча кэриҥэ сайабылыанньа киирдэ.
Онтон 84 %-гар үтүө быһаарыы булулунна, оттон ордубут боппуруостар үлэҕэ сылдьаллар. Бу туһунан байыаннай дьайыы кыттыылаахтарын өйүүр «Аҕа дойдуну көмүскээччилэр» судаарыстыбаннай пуонда Саха Өрөспүүбүлүкэтинээҕи филиалын салайааччыта Алексей Александров иһитиннэрдэ.
«Биһиги филиалбыт байыаннай дьайыылар бэтэрээннэригэр, байыаннай эпэрээссийэҕэ өлбүт уонна сураҕа суох сүппүт дьон дьиэ кэргэттэригэр көмөнү уонна өйөбүлү оҥорор үлэтин салгыыр. Саха сирин улуустарыгар уонна куораттарыгар социальнай координатордар 10 тыһ. тахса гражданины арыаллыыллар. Сураҕа суох сүппүттэри көрдөөһүҥҥэ көмөлөһүү уонна салайыы чэрчитинэн биһиги байыаннай сулууспалаахтар аймахтарын көрүүнү ыытабыт, ДНК-ны арааран ыларга босхо генетическэй матырыйаалы ылабыт, көрдүүргэ аналлаах Көрдүүр каарталары толоробут», — диэн бэлиэтээтэ Алексей Александров.
Кини иһитиннэрэринэн, генетическэй матырыйаал (буккальнай эпителий) холобурун ылыы Дьокуускай куоракка судаарыстыбаннай пуонда филиалын офиһыгар үлэһиттэринэн оҥоһуллар, оттон өрөспүүбүлүкэ улуустарыгар — социальнай координатор эбэтэр муниципалитет дьаһалтатын эппиэттээх үлэһитин хайысхатынан улуустааҕы киин балыыһаларга ылыллар.
Көрдүүр дьаһаллары ыытар туһугар судаарыстыбаннай пуонда филиала нэдиэлэ аайы Көрдүүр каарталары Ростов-на-Дону куоракка РФ Оборуонаҕа министиэристибэтин боломуочуйалаах уорганыгар ыытары хааччыйар, оттон генетическэй матырыйаал холобурдара нэдиэлэ аайы Арассыыйа СК Дьокуускайдааҕы гарнизонугар Байыаннай силиэстийэлиир салааҕа бэриллэллэр.
Сураҕа суох сүппүттэри көрдөөһүн, Көрдүүр каарталары толоруу уонна генетическэй матырыйаал холобурдарын туттарыы боппуруостарынан олорор сиргитинэн улууска судаарыстыбаннай пуонда филиалын социальнай координаторыгар тиийэргит наада. Социальнай координатордар суох улуустарыгар муниципалитет дьаһалтатыгар көрдөһөр ирдэнэр, оттон Дьокуускай куоракка — «Аҕа дойдуну көмүскээччилэр» судаарыстыбаннай пуонда филиалыгар Ойуунускай уулуссатын 41/1 дьиэтигэр тиийиэххэ сөп.
Эбии иһитиннэриини 8 (4112) 506-506 төлөпүөнүнэн билсиэххэ сөп, үлэ кэмигэр сарсыарда 09:00 чаастан киэһэ 18:00 чааска диэри.