Ньурба судаарыстыбаннай көһө сылдьар драматическай тыйаатыра, «Культура малой Родины» бырайыак кыттыылааҕын быһыытынан «Театры малых городов» хайысханан 300 тыһыынчаҕа тиийэ киһилээх нэһилиэнньэлээх пууннарга муниципальнай тыйаатырдар айар үлэлэрин өйүүргэ 1520425,54 солк. суумалаах субсидия ылбыта. Ол иһигэр федеральнай үп суотугар 1429200,00 солк., Саха сирин судаарыстыбаннай бүддьүөтүтттэн 91225,54 солк.
300 тыһыынчаҕа тиийэ киһилээх нэһилиэнньэлээх пууннарга муниципальнай тыйаатырдар айар үлэлэрин өйүүр бырагырааманан ылыллыбыт үбүнэн оборудование – сыанаҕа аналлаах өҥнөөх LED экран, сыананы сырдатар тэрил ыытыллыбыт.
Тыаһы-ууһу оҥорор оператор Валентин Николаев маннык кэпсиир:
— Өҥнөөх LED экран ылыллыан иннинэ биһиги тыйаатырбытыгар сыанаҕа проектор экранын туһаналлара. Экраны тыйаатыр испэктээкилигэр, тэрээһиннэргэ туһанарбыт. Көрөөччүлэр саҥа экран бэртээхэй хаачыстыбатын тута бэлиэтээтилэр. Ону тэҥэ туруорууларга туһанарга анаан ыйанар сибэтиилинньик атыылаһылынна.
2-с Колхозтааҕы Ньурба судаарыстыбаннай тыйаатыра төрүттэммитэ 85 сылыгар, Саха Өрөспүүбүлүкэтин култууратын тэрилтэлэригэр историческай өйдөбүнньүк сылыгар, Саха сиригэр Аҕа дойдуну көмүскээччи сылыгар, Арассыыйаҕа Аҕа дойдуну көмүскээччи сылыгар, РФ үөрэҕириитин туйгуна, СӨ үөрэҕириитин тиһигин Бочуоттаах бэтэрээнэ Ефросиния Иванова «Тойук, прана хонуутугар тохтообут» драматынан Кыайыы 80 сылыгар испэктээк туруоруллубута. Бу туруоруу – сэриигэ кыайбыт көлүөнэ хорсун быһыытыгар үрдүк сүгүрүйүү буолар. Көлүөнэлэр өйдөрө-санаалара кэмнэри ситимниир звено быһыытынан биһигини күүстээх, муударай оҥорор.
Ефросиния Иванова, ааптар:
– Николай Константинов – мин эбэм соҕотох бииргэ төрөөбүт уола. Кини мин 14 саастаахпар суох буолбута. Кини мин дьоллоох буоларбар тугу барытын оҥорбута, оттон бу пьесаны эбэм кэриэһигэр суруйбутум. Ньурба тыйаатырын кэллэктиибигэр, режиссер Юрий Алексеевичка тыйаатыр артыыстарын бары көлүөнэлэрэ оонньуур туруорууларын иһин махтанабын. Ньурба тыйаатырын репертуарыгар мин пьесам тахсыбытыттан олус үөрэбин. Барыгытыгар ситиһиилэри, олоххо дьолу баҕарабын.