Быйыл оҕо үөрэҕин төлөбүрүн иһин НДФЛ-тан (физическэй сирэйдэр дохуоттарыттан тутуллар нолуоктан) төннөрүлүнэр социальнай вычет муҥутуур кээмэйэ хас биирдии оҕоҕо 110 тыһыынча солкуобайга тэҥнэһиэҕэ. Бу туһунан экэниэмикэ билимнэрин кандидата, Плеханов аатынан РЭУ судаарыстыбаннай уонна муниципальнай үп кафедратын доцена Екатерина Голубцова иһитиннэрдэ.
«Оҕо үөрэҕин төлөбүрүгэр чэпчэтии — бу икки төрөппүтү холбоон, хас биирдии оҕоҕо сылга 110 000 солкуобай кээмэйдээх уопсай суума буолар», — диэн Голубцова иһитиннэрдэ уонна нолуок төлөөччү НДФЛ-тан төннөрөр (вычет) бары социальнай суумаларын уопсай кээмэйэ 150 000 солкуобайтан ааһыа суохтааҕын санатта. Бу туһунан РИА «Новости» суруйар.
Ону таһынан 2026 сылга Арассыыйа олохтоохторо мэдиссиинэ өҥөлөрүгэр, үөрэххэ уонна «фитнескэ» (успуортка) төлөөбүт харчыларыттан НДФЛ социальнай вычетын туһанан харчы төннөрүөхтэрин сөбүн экэнэмиис санатта. Холобур, НДФЛ 13 %-наах ыстаапкатыгар төрөппүт 14 300 солкуобайы, оттон 15 %-наах ыстаапкаҕа 16 500 солкуобайы төннөрүөн сөп.
Харчы төннөрүүтүн (вычеты) 24 сааһыгар диэри оҕо уонна 18 сааһыгар диэри көрүүгэ-истиигэ ылбыт оҕо күнүскү өттүгэр үөрэнэр төлөбүрүн иһин ылыахха сөп. Социальнай нолуок вычетын ылар быраап хас да дөкүмүөнүнэн бигэргэтиллиэхтээх диэн Федеральнай нолуок сулууспатын (ФНС) быһаарыытыгар этиллэр.
Харчыны үрдүк үөрэх кыһаларын төлөбүрүн иһин эрэ буолбакка, атын үөрэх тэрилтэлэригэр — судаарыстыбаннай да, чааһынай да буоллун — төлөөбүт харчыттан төннөрүөххэ сөп. Ол иһигэр оҕо уһуйааннара уонна оскуолалар киирэллэр, сүрүн ирдэбилэ — тэрилтэ үөрэтэр үлэни ыытарын бигэргэтэр лиссиэнсийэлээх эбэтэр атын докумуоннаах буолуохтаах.
Демографияҕа сытыы кириисис буола турар кэмигэр былаастар оҕо төрөөһүнүн көҕүлүү сатыыллар. Дойдуга оҕолоох ыаллары өйүүр дьаһаллар кэҥииллэр, ол иһигэр кыаммат ыалларга биир кэлим босуобуйа, ийэ хапытаала уонна социальнай төлөбүрдэр үрдүүллэр, ону тэҥэ оҕо иһин нолуогу төннөрүү кээмэйэ улаатара киирэллэр. РФ вице-премьерэ Татьяна Голикова иһитиннэрбитинэн, 2025 сыл түмүгүнэн Арассыыйа 18 эрэгийиэнигэр оҕо төрөөһүнэ улааппыта бэлиэтэнэр.