Саха сирин уон тыһыынчаттан тахса олохтооҕо адаптивнай успуорт көрүҥүнэн тиһиктээхтик дьарыктанар.
Бу туһунан «Саха» НКИХ «Диалог с властью» араадьыйанан биэриитигэр СӨ успуорка миниистирин бастакы солбуйааччыта Гаврил Мохначевскай эттэ.
Кини өрөспүүбүлүкэҕэ адаптивнай физкултуура уонна успуорт сайдыыта 2010-с сыллар саҕаланыыларыттан тиһиктээх киирбитин ыйар. Бүгүн эрэгийиэн социальнай бэлиитикэтин биир туруктаах хайысхатынан буолар. Бу хайысхаҕа тиһиктээх үлэни РФ Бэрэсидьиэнэ Владимир Путин көҕүлээбит «Спорт России» судаарыстыбаннай бырагырааматын чэрчитинэн, өрөспүүбүлүкэтээҕи адаптивнай физкултуура уонна успуорт киинэ сүрүннүүр. Сүрүн болҕомто физическэй реабилитацияҕа, социальнай адаптацияҕа уонна доруобуйаларыгар хааччахтаах дьону успуордунан дьарыктаналларыгар угуйууга, тардыыга ууруллар.
Гаврил Мохначевскай бэлиэтээбитинэн, адаптивнай успуорт доруобуйаларынан хааччахтаах дьоҥҥо категорияларынан хас да хайысханан үлэлиир. 2023 сылтан бааһырыы кэнниттэн реабилитацияланар байыаннай дьайыы кыттыылаахтарын өйүүр хайысханан үлэ эмиэ ыытыллар.
Гаврил Мохначевскай маны таһынан, каадыр боппуруоһун быһаарарга өрөспүүбүлүкэҕэ физическэй култуура уонна успуорт эйгэтигэр исписэлиистэри тардыыга туһуламмыт «Земскэй тириэньэр» бырагырааманы эмиэ бэлиэтиир. Ол курдук, 2025 сыллаахха үс квотанан исписэлиистэр Хаҥаласка, Мэҥэ Хаҥаласка уонна Жатайга үлэлии барбыттар. Быйыл, 2026 сылга, 18 исписэлиис квотанан үлэлии барыаҕа диэн этиллэр.
Сиһилии: https://www.sakha.gov.ru/news/42893
СӨ Ил Дарханын уонна Бырабыыталыстыбатын пресс-сулууспата