Муус устар 19 күнүгэр өрөбүллээҕи оһуокайбыт Горнай улууһугар ананна. Горнай улууһа быйыл тэриллибитэ 95 сылыгар анаммыта мээнэҕэ буолбатах.
Историяны сэгэтэр буоллахха, 1931 сыллаахха бэс ыйын 25 күнүгэр Саха сирин Киин ситэриилээх кэмитиэтин мунньаҕын боротокуолунан Арҕаа Хаҥалас уонна Нам улууһун кытыы сытар нэһилиэктэриттэн холбоон Горнай улууһа тэриллибитэ. Бу кэм устатыгар элбэх оһуокайдьыт таҕыста. Ол курдук Саха АССР, РСФСР культуратын үлэһитэ М.С.Егоров, А.С.Аргунова П.М.Михайлов о.д.а.
Бүгүҥҥү оһуокайбытын үтүөлээх этээччи П.Д.Федоров-Айылҕа оҕото көмүлүөккэ алгыһынан саҕаланна. Оһуокайы Ил Дархан оһуокайга стипендиата Д.Е.Алексеева, А.С.Александров, эдэр этээччи Анастасия Кокорева, Горнайтан төрүттээх үтүөлээх этээччилэр Мария Иванова, Прокопий Федоров о.д.а. эттилэр.
Быыһыгар ырыанан эҕэрдэлэри иһиттибит. Дарья Егоровна баянынан вальс, тустеп үҥкүүлэттэ. А.Д.Макарова аатынан культура колледжын устудьуоннара кэлэн түһүлгэ аайы үҥкүүлэстилэр.
Оһуокайга куорат олохтоохторо мустан, салҕанан бара турар.
Марта Николаева