Арассыыйа учуонайдара айбыт искэни утары саҥа вакциналара нэһилиэнньэ киэҥ араҥатыгар ордук тиийимтиэ буолуон сөп. Доруобуйа харыстабылын министиэристибэтэ аһаҕас эйгэҕэ сокуон барылын бэчээттээтэ, бу барыл мэдиссиинэ тэрилтэлэригэр экспериментальнай генотерапевтическай препараттары судаарыстыбаннай регистрациятын кэтэспэккэ эрэ, ыарыһахтары эмтииргэ туһанар быраабы биэрэр.
Маннык көрүҥнээх препараттарга анаан сокуон барылыгар туспа ыстатыйалар киирэллэр, олор мэдиссиинэ тэрилтэлэригэр препараттары килииньикэ иннинээҕи чинчийиилэрин уонна эспэртииһэлэрин ыытар, туһанар, харайар уонна суох оҥорор быраабы биэрэллэр. Бу бары функциялар анал бэрээдэккэ уонна ураты көҥүллэргэ олоҕуран толоруллуохтара диэн сабаҕаланар. Маны барытын бырабыытылыстыба тустаах докумуоннарын чэрчилэринэн оҥоруохтаах.
Көҕүлээһин ааптардара быһаарыы сурукка бэлиэтииллэринэн, билиҥҥи сокуонунан регистрацияны ааспатах мэдиссиинэ препараттарын эмтиир процедураларга туһанар көҥүллэнэр. Ол эрээри, биллэн турар, ханныгы баҕарар буолбатах: манна үрдүк технологиялаах, нестандартнай эбэтэр экспериментальнай технология көмөтүнэн оҥоһуллубут уонна хайа эрэ чопчу ылыллыбыт тэрилтэҕэ биирдиилээн туһанарга аналлаах эмтэр тустарынан этиллэр. Билиҥҥи кэмҥэ сокуон барыла дьон-сэргэ дьүүллэһиитигэр сылдьар. Бу ыам ыйын 15 күнүгэр диэри салҕаныаҕа.