Саха Өрөспүүбүлүкэтин күнүн көрсө «Чолбон» сурунаал Туймаада хочотун олохтоохторугар уонна ыалдьыттарыгар саха омук төрүт өйүн төлөннүүр, уран тылын уһаарар «Чолбон өй күрэһэ» хамаанданан оонньуута муус устар 22 күнүгэр ыытылынна.
Кыттааччылары «Чолбон» сурунаал бас эрэдээктэрэ Гаврил Андросов эҕэрдэлээн туран, сурунаал ис хоһоонун, рубрикаларын билиһиннэрдэ уонна сурунаал 100 сыллаах үбүлүөйүн көрсө ыытар үлэлэрин кэпсээтэ.
Үстүү буолан түмсэн саха литературатыгар, историятыгар билиилэрин Е.Ярославскай аатынан кыраайы үөрэтэр уонна П.А.Ойуунускай аатынан Литература түмэллэрин, М.К.Аммосов ХИФУ саха салаатын студеннарын, Оҕо искусствотын оскуолатын коллективтарын уонна Дьокуускай куорат, Нам улууһун олохтоохторун хамаандалара тургутустулар, саҥаны биллилэр. Ол курдук Маһары Бозековтан саҕалаан саха бэйэтин салайыныытын историятыгар, Автономияны туруулаһыыга уонна литератураҕа сыһыаннаах ыйытыылардаах үс түһүмэҕинэн оонньуу барда.
«Сэргэлээх уоттара» хамаанда кыттааччыта Эльдар Садовников оонньуу туһунан санаатын маннык үллэһиннэ:
«Мин бу «Чолбон» сурунаал ыытар оонньууларыгар иккиспин кыттабын. Бастакы кыттыбыт оонньуум литератураҕа сыһыаннаах буолан чэпчэки этэ. Бу оонньуу ыйытыылара үксэ история тематыгар буолан уустук соҕус буолла. Кыттаммыт элбэҕи биллибит. Степной Дума туһунан, сахалартан бастакы депутаттар тустарынан аҕыйаҕы билэр этибит. «Саха сирин историята — литератураҕа» диэн үһүс түһүмэххэ биир эрэ сыыһа хоруйдаах буоллубут. Элбэҕи билэн, билиибитин кэҥэппиппититтэн астынныбыт».
Бүлүү педучилищетыгар үөрэммит сурунаал доҕотторо — «Бүлүү сыдьаайа» хамаандаттан Акулина Колмогорова:
«Оонньууга кэлиэхпит иннинэ автономия историятыгар ыйытыылар баар буолаллара буолуо диэн анаан бэлэмнэммиппит уонна «Чолбон» сурунаал 100 сыллаах үбүлүөйэ диэммит бэчээт эйгэтин историятын аахпыппыт. Ыраахтааҕы саҕанааҕы Саха сирин историятын олох тыыппатахпыт, ол да буоллар син барыстыбыт диэн үөрэ олоробут. Маннык оонньуулар ыытыллаллара үчүгэй», — диэн эттэ.
«Чаҕыл күн-ай» хамаанда кыттааччыта Евгений Васильев:
««Айар аартыктар» куйаар ситимин бөлөҕүн чилиэннэрэ түмсэн кытынныбыт бүгүн. Саха литературатын ааҕарбыт көмөлөстө. Николай Якутскай «Төлкө» романыгар Нестор Каландарашвили кэлиитин аахпыппын олох өйбөр хатыы сылдьар эбиппин. Оонньууну биһирээтибит. Билиибитин тургуттубут, өйбүт сытыытык үлэлээтэ. Тэрийээччилэргэ — махтал. Кэмиттэн кэмигэр маннык үчүгэй тэрээһиннэри ыыта турун», — диэн баҕа санаатын тиэртэ.
Түмүккэ «Бүлүү сыдьаайа» хамаанда III миэстэ буолан, оонньуу спонсора «Уус-Экспо» хампаанньа 3000 солк. суумалаах сертификаттарынан наҕараадаланнылар.
«Умсулҕан» хамаанда кэрэ-нарын киэргэллэри оҥорор «Киэргэ» хампаанньа 3000 солк. суумалаах сертификатын тутта.
Түһүмэх аайы 11 очкону ылан (13 сөптөөхтөн) П.А.Ойуунускай аатынан Литература музейын «Балаҕан оҕолоро» хамаанда II миэстэ буолан, саха мандарын, уратытын киэргэллэригэр тиһэр «Уруу» хампаанньа ураты ытарҕаларынан наҕараадаланнылар.
Бастакы миэстэни Афанасий, Алгыс уонна Айхал Петровтар дьиэ-кэргэн ылан, туойтан үйэлээх оҥоһуктары оҥорор «Көмүлүөк» хампаанньа тойон чорооннорун күөрэччи көтөхтүлэр.
Үөрүүлээх уопсай хаартыскаҕа түһүү кэннэ кыттааччылар: «Аны хаһан кэлэр оонньуу буоларый?» — диэн сүрдээх үчүгэй ыйытыыны биэрдилэр. Онон, кэлэр оонньууларга көрсүөххэ диэри!
Туяра Павлова
Сообщение «Чолбон өй күрэһигэр» хамаандалар билиилэрин тургуттулар появились сначала на Улус Медиа.