«Кыайыы дьыктаана» историческай аахсыйа бүгүн 1034 былаһааккаҕа ыытылынна.
Кыттааччылар 45 мүнүүтэ устатыгар 25 боппуруоска эппиэттээтилэр. Дьыктааны саамай түгэх нэһилиэктэр олохтоохторо, ол иһигэр Аллараа Халыма улууһун Андрюшкино бөһүөлэгин олохтоохторо Алаһыай өрүс кытылыгар, Эбээн Бытантайга көс оскуола оҕолоро кытта суруйдулар. Оттон саамай элбэх кыттааччылаах былаһаакканан Дьокуускайдааҕы 40 №-дээх оскуола буолар, манна 500 киһиэхэ миэстэ бэлэмнэммит.
Ил Түмэн мунньахтыыр саалатыгар Кыайыы дьыктаанын суруйууга 58 киһи: парламент салалтата, бастайааннай кэмитиэттэр бэрэссэдээтэллэрэ, норуот дьокутааттара, аппараат үлэһиттэрэ, Счетнай палаата, Конституционнай сэбиэт бэрэстэбиитэллэрэ, ону тэҥэ Ыччат парламенын чилиэннэрэ кытыннылар.
Норуот дьокутаата Александр Подголов дьыктаан сүрүн суолтата — историческай өйдөбүлү умнубакка тутан илдьэ сылдьыы диэн тоһоҕолоон бэлиэтээтэ:
“Бу сэриигэ хас биирдии дьиэ кэргэнтэн ким эрэ олоҕун толук уурбута, ол өйдөбүл хас биирдии дьиэ кэргэҥҥэ тыыннаах буолуохтаах, дьыктаан суолтата – ол буолар. Манна кыттан, биһиги гражданскай иэспитин төлүүбүт уонна эдэр көлүөнэҕэ холобур көрдөрөбүт”.
Ил Түмэҥҥэ “Биир ньыгыл Арассыыйа” фракциятын салайааччытын солбуйааччы Иван Луцкан, “Кыайыы дьыктаанын” чуолаан “Биир ньыгыл Арассыыйа” көҕүлээн ыытарын, өрөспүүбүлүкэҕэ куруук үрдүк таһымнаахтык барарын эттэ:
“Быйыл тыһыынчаттан тахса былаһаакка үлэлээтэ, онон Арассыыйа субъектарын ортотугар бастакы миэстэни ыллыбыт. Бу барыта биһиги Аҕа дойду Улуу сэриитигэр ураты болҕомтолоохтук сыһыаннаһарбытын көрдөрөр. Дьыктаан саамай уустук ыйытыылара да устуоруйа саҥа страницаларын арыйарга көмөлөһөллөр”, — диэн туран барыларыгар ситиһиини баҕарда.