Албанияҕа эр дьоҥҥо көҥүл тустууга Европа чөмпүйэнээтэ ыытыллар. Муус устар 23 күнүгэр кыттааччылар сэрэбиэйдэрин тардыы буолла. Саха тустууктара Арыйаан Тютрин уонна Владимир Егоров утарсааччыларын биллилэр. Бу туһунан «Триумф» пресс-киинэ иһитиннэрэр.
Арыйаан Тютрин бүгүн, муус устар 24 күнүгэр, 57 киилэҕэ диэри ыйааһыҥҥа Беларусь өрөспүүбүлүкэтин аатыттан тустуоҕа. Кини бастакы утарсааччытынан Турция тустуугар Юсуф Демир буолуоҕа. Уолаттар быйыл Иван Ярыгин турнирыгар көрсүспүттэрэ. Оччолорго саха тустууга 11:4 ахсаанынан кыайыыны ситиспитэ.
Салгыы бу икки тустууктан кыайбыт киһини Европа чөмпүйүөнээтин призера, Азербайджантан сылдьар Ислам Базарганов кэтэһэр. Киирсиилэр Дьокуускай бириэмэтинэн 17:30 чааска саҕаланыахтара.
Македония аатыттан тустар Владимир Егоровка киирсии уустук буолуо диэн сабаҕалыыллар. Кини муус устар 25 күнүгэр 61 киилэҕэ диэри ыйааһыҥҥа тустуоҕа. Бастакы киирсиитигэр кини Европа элбэх төгүллээх чөмпүйүөнүн, Армения тустуугун Арсен Арутюняны кытта тустуоҕа.