Дьокуускайга «Триумф» уораҕайыгар бүгүн, кулун тутар 7 күнүгэр, Олимпийскай чөмпүйүөн, ССРС успуордун үтүөлээх маастара, ССРС үтүөлээх тириэньэрэ Роман Михайлович Дмитриев кэриэһигэр юниордар ортолоругар спортивнай тустууга Норуоттар икки ардыларынааҕы XII күрэхтэһии үөрүүлээхтик аһыллыыта буолла.
—Турнир улуу спортсмен уонна настаабынньык туһунан өйдүү-саныы сылдьарбыт мэктиэтинэн буолар, ытык киһи олоҕо, ситиһиитэ, дьулуура үтүө холобурунан буолар. Роман Дмитриев Олимпийскай оонньууларга кыайыыта саха тустуутун историятыгар букатыннаахтык киирбитэ уонна тустууктар эдэр көлүөнэлэрин көҕүлүүр ураты күүстээх. Быйылгы күрэхтэһии ураты суолтата — Саха сирин спортсменнарын 1976 сыллааҕы Монреальга буолбут Олимпиадаҕа историческай өрөгөйдөрүн 50 сыла, саха сэмэй уолаттара тустуу оскуолатын күүһүн-кыаҕын аан дойдуга көрдөрбүттэрэ, итэҕэппиттэрэ, — диэн СӨ Ил Дархана Айсен Николаев МАХ мессенджерыгар бэйэтин ханаалыгар суруйар.
Кини «Триумф» уораҕайыгар түһүлгэҕэ Арассыыйаттан, Молдоваттан, Кытайтан уонна Монголияттан 127 эдэр спортсмен түмсүбүтүн бэлиэтиир.
Үксүлэригэр бу турнир — успуорка сирдиир түһүмэҕинэн буоларын сэргэ, кыайыыга дьулуһарга уонна көҥүл тустуу үгэһин ытыктыырга үөрэтэр.
—Роман Дмитриев кэриэһигэр ыытыллар күрэхтэһии салгыы эдэр спортсменнары түмэн, норуоттар икки ардыларынааҕы спортивнай доҕордоһууну бөҕөргөтөн, тустууктар саҥа көлүөнэлэрин улахан кыайыыларга көҕүлүүрүгэр эрэнэбин, — диэн Ил Дархан Айсен Николаев күөн күрэс бары кыттыылаахтарыгар туһаайар, кинилэргэ чаҕылхай хапсыһыылары, чиэһинэй тустууну уонна кыайыылары баҕарар.
Бэлиэтээн эттэххэ бүгүн, Роман Дмитриев төрөөбүт күнүгэр, «Туймаада»стадион аттыгар Комсомол болуоссатыгар пааматынньыкка сибэкки дьөрбөтүн ууруу сиэрэ-туома буолла. Өрөспүүбүлүкэҕэ көҥүл тустууга Олимпийскай чөмпүйүөн аатын үйэтитиигэ өйдөбүнньүк тэрээһиннэр киэҥник уонна тиһиктээхтик ыытыллаллар. Роман Дмитриев аатынан уулуссалар, искибиэрдэр, орто уопсай үөрэхтээһин оскуолата, олимпийскай эрэллэри бэлэмниир училище бааллар. Роман Михайлович — ССРС успуордун үтүөлээх маастара, САССР, РСФСР, ССРС үтүөлээх тириэньэрэ, Саха АССР физическэй култуураҕа үтүөлээх үлэһитэ, «Знак Почета» уонна «Полярная звезда» уордьаннар, «За трудовую доблесть» мэтээл кавалердара, Дьокуускай, Эдьигээн, Бүлүү, Чурапчы улуустарын бочуоттаах гражданина.
Сиһилии: https://www.sakha.gov.ru/news/38
Саргын Скрябин хаартыскаларга түһэриитэ, ЯСИА