Марфа, Сергей Расторгуевтар ааттарынан Саха циркэтигэр »Дороти» испэктээкил ситиһиилээхтик сүрэхтэннэ. Ураты драманы биллэр режиссер Сергей Потапов туруорда.
Судаарыстыбаннай циркэ дириэктэрэ Сергей Расторгуев: «Бу маннык дьикти испэктээкил биһиэхэ өссө тура илик этэ. Онон артыыстар да, биһиги да олус долгуйабыт», — диэн эттэ.
Чахчы да туруоруу уратытык саҕаланна. Туох да муусуката, уота-күөһэ суох, циркэ артыыстара эрэпэтииссийэлии сылдьаллара көһүннэ. Тоҕо диэтэр, Дороти төрөппүттэрэ циркэ артыыстара этилэр.
Тыйаатыр уонна циркэ ускуустубалара хайдах дьүөрэлэһэллэрий? Аҕыйах сыллааҕыта Олоҥхо ыһыаҕар циркэ ускуустубата уонна олоҥхо бэркэ дьүөрэлэһэллэрин көрөн, сөхпүттээҕим.
Бу испэктээкилгэ да барыта орун оннугар буолан истэ. Холобур, салгыҥҥа кулахачыйа ыстанар акробаттар Көтөр эбисийээнэлэр буоллулар. Аптаах Оз эрэннэрбитин толороругар — Страшилаҕа өйдөөх мэйиини, Дровосекка таптыыр сүрэҕи, Хахайга хорсун буолууну биэрэригэр, фокустары көрдөрдө.
Дороти оруолун салгын гимнастката Анна Максимова оонньуур. Кини дойдутугар салгын шарынан көтөрүгэр, аптаах фея көрсөрүгэр куупал аннынан туох да быата-туһаҕа суох кыырайа көтөллөр.
»Дороти» испэктээкил бүгүн, сарсын эрэ буолар. Бу күн циркэ эрэллээх көрөөччүлэрэ кэлбиттэрэ биллэр, ытыс тыаһын, »биис!», »браво» хаһыыларын харыстаабатылар.
Ангелина Васильева.