М.К.Аммосов аатынан Хотугулуу-Илиҥҥи федеральнай университекка 2026-2027 үөрэх дьылыгар үөрэххэ ылыыга кэккэ уларыйыылар киирбиттэр. Саҥаны киллэрии биир кэлим эксэмээн алын баала үрдээһинигэр итиэннэ сорох хайысхаларга төлөбүрдээх үөрэххэ хааччахтааһын киириитигэр сыһыаннаах. Бу туһунан университет пресс-сулууспата иһитиннэрэр.
“Дойду бары үрдүк үөрэхтэрин кыһаларын сүрүн түһүмэҕэр – саҥа устудьуоннары ылыахтарыгар диэри балтараа ыйтан арыый ордук кэм хаалла. 2026 сыллааҕы хампаанньа саҥа ирдэбиллэри учуоттаан ыытыллыаҕа, ХИФУ РФ Билимин, үрдүк үөрэҕин министиэристибэтэ быһаарбыт нуормаларын олоччу тутуһан олоххо киллэриэҕэ. Бу уларыйыылар сүрүн соруктара – үөрэххэ туттарсааччылары бэлэмнээһин хаачыстыбатын үрдэтии уонна экэниэмикэ дьиҥнээх ирдэбиллэригэр сөп түбэһиннэрэн үөрэххэ ылыы. Биһиги университеппыт онно анаан исписэлиистэри бэлэмниир” – диэн ХИФУ ректора Анатолий Николаев бэлиэтиир.
Ректор икки сүрүн саҥаны киллэриини ыйар. Бастакытынан – биир кэлим эксээмэн алын баалын үрдэтии. ХИФУга киирэр алын баал РФ Билимҥэ, үрдүк үөрэххэ министиэристибэтин ирдэбилигэр сөп түбэһиннэрэн оҥоһулунна.
“Ордук омук тылыгар уон баал эбиллибитин уонна устуоруйа биридимиэтигэр көрүү күүһүрбүтүн бэлиэтиибин. Бу аата биһиги эрдэттэн чопчу идэни баһылыыр сыаллаах-соруктаах үөрэххэ туттарса кэлэр дьону күүтэрбитин туоһулуур. Быйыл базовай 40 баал бары биридимиэттэргэ көмүс ыстандаартынан буолар” – диэн кини ыйар.
2026-2027 үөрэх дьылыгар биир кэлим эксээмэн алын баала:
— Физика: 39-тан 41 баал.
— История: 36-тан 40 баал.
— Информатика: 44-тэн 46 баал.
— Омук тыла: 30-тан 40 баал.
— Биология уонна химия: 39-тан 40 баал.
Атын биридимиэттэргэ алын бааллар уруккутунан хааллылар: нуучча тылыгар, математикаҕа (уустугурдуллубут таһым), литэрэтиирэҕэ уонна географияҕа — 40, обществознаниеҕа — 45.
Иккис уларыйыы – төлөбүрдээх үөрэххэ лимиити киллэрии. РФ Бырабыыталыстыбатын дьаһалыгар олоҕуран, стратегическай суолталаах хайысхаларга төлөбүрдээх миэстэлэр ахсааннарыгар университет хааччахтааһыны киллэрэр. Бу быһаарыы түмүгэр төлөбүрдээх миэстэҕэ ылыы маассабайтан куонкурустаахха көһүөхтээх.
Хааччахтааһыҥҥа «Архитектура», «Ньиэп, гаас дьыалата», «Психология», «Экэниэмикэ», «Менеджмент», «Юриспруденция», «Журналистика», «Стоматология», «Хайа дьыалата», «Филология», «Лингвистика» уо.д.а. хайысхалар хапсаллар.
“Быйыл үөрэххэ туттарсааччыларга мин сүрүн сүбэм маннык: үөрэххэ киирэр кыаххытын намтатымаҥ. Элбэх талар кыах үөскүүрүн уонна баҕарбыт исписэлиинэскитигэр киирэргит туһугар уустугурдуллубут математикаҕа, физикаҕа, химияҕа уонна атын дириҥэтэн үөрэтиллэр биридимиэттэргэ болҕомтоҕутун ууруҥ. Уларыйа турар усулуобуйалаах олоххо ити эһиги ситиһиилээхтик үүнэр-сайдар суолгут буолар” – диэн ректор эбэн этэр.
Санатан эттэххэ, Арассыыйа Бэрэсидьиэнэ Владимир Путин 2025 сыл ахсынньы 25 күнүгэр буолан ааспыт Судаарыстыбаннай Сэбиэт мунньаҕар дойдуга каадыры бэлэмнээһин көрүүтүн барытын уларытар ирдэнэр диэн этэн турар. Тустаах миэрэлэр “Ыччат уонна оҕо” национальнай бырайыагы олоххо киллэрэр соруктаах ылынылллаллар.
Бу туһунан Ил Дархан уонна Бырабыыталыстыба пресс-сулууспата суруйар.