Таатта улууһугар Н.Е.Мординов-Амма Аччыгыйа аатынан Харбалаахтааҕы үөрэхтээһин холбоһугар «Мин — өрөспүүбүлүкэ инники кэскилэбин!» диэн тумус тыллаах «Ситиһии күнэ» буолла.
Дьоро күн бастакы чааһынан физика кэбиниэтигэр бастыҥ, киэн туттар, элбэх оҕону физика биридимиэтинэн умсугутан, саахымакка уһуйан, үрдүккэ көтүппүт дириҥ билиилээх, талааннаах учууталбыт Степан Николаевич Александров сырдык аатын иҥэрии, киниэхэ анаммыт «Үрдүккэ кынаттаабыт учууталбыт Степан Николаевич Александров» истиэндэни арыйыы буолла. Бу истиэндэни оскуола түмэлин салайааччыта В.В.Блахирова хамаанда тэринэн оҥордулар. Истиэндэ бастакы чааһа С.Н. Александров олоҕун уонна үлэтин билиһиннэрэр. Иккис блокка улууска, өрөспүүбүлүкэҕэ, Арассыыйаҕа, норуоттар икки ардыларынааҕы олимпиадаларга, саахымакка күрэхтэһэн миэстэлэспит, физиканы кытта сибээстээх үөрэхтэргэ үөрэммит үөрэнээччилэрин ааттара сурулунна. Үһүс блокка физиканан, саахыматынан Степан Николаевичка дьарыктаммыт үөрэнээччилэр хаартыскалара кэчигирээтэ.
Кэбиниэт үөрүүлээх аһыллыытыгар тапталлаах учууталларын туһунан видео-ахтыыны Новай Зеландияттан тиийэ ыыппыттарын истэн олус астынныбыт. Харбалаахтан, Дьокуускайтан үөрэнээччилэрэ Айсена Васильева, Михаил Новгородов, Ольга Бродникова уо.д.а. тыл эттилэр.
“Бу кэбиниэт үүнэр көлүөнэ ыччаты үрдүккэ сирдии турдун” диэн алгыс тылынан үөрүүлээх чааһы түмүктээтибит.
Дьоро күн иккис чааһа аактабай саалаҕа салҕанна. Үгэс быһыытынан, үөрэх туйгуннара, бастыҥнара, олимпиадалар, араас НПК-лар, ааҕыылар, успуорт күрэхтэрин кыайыылаахтара чиэстэннилэр. Уһулуччу ситиһиилээх оҕолор отучча араас истипиэндьийэни тутан үөрдүлэр. Истипиэндьийэлэри туттарыы быйыл стипендиаттары үйэтитэр истиэндэ таһыгар ыытыллыбыта сонун көстүү буолла. Истипиэндьийэни туппут үөрэнээччи ол истиэндэҕэ хаартыскатын тута уган үйэтиттэ. Быйыл урукку истипиэндьийэлэргэ эбии Евдокия Трофимовна, Виктор Васильевич Протопоповтар дьиэ кэргэн 2 истипиэндьийэни олохтоотулар. Ол курдук, байыаннай дьайыыга хорсуннук сэриилэһэ сылдьан сырдык тыына быстыбыт уоллара Сергей Викторович Протопопов аатын үйэтитэн, успуорка ситиһиилээх оҕоҕо истипиэндьийэни уонна аҕалара, үөрэхтээһин туйгуна, уус бэрдэ Виктор Васильевич Протопопов аатынан сүүрүк оҕоҕо туттарыллар истипиэндьийэлэри анаатылар.
Быйылгы үөрэх дьылыгар «Сыл бастыҥ үөрэнээччитэ» үрдүк ааты 11 кылаас туйгун үөрэнээччитэ Айсен Бястинов сүгэр чиэскэ тигистэ. Киниэхэ холбоһук дириэктэрэ Л.А. Афанасьева холбоһук дьаһалтата быйылгыттан саҥа олохтообут Н.Е.Мординов-Амма Аччыгыйа аатынан бастакы нүөмэрдээх истипиэндьийэни үөрүүлээх быһыыга-майгыга туттарда. Ону таһынан, олохтоох дьаһалта бэлэҕин тутта. Айсен маҥнайгы кылаастан наар «5» сыанаҕа үөрэнэн кэллэ, араас биридимиэттэргэ ситиһиилээх олимпиадник, академическай ааҕыы бөлөҕөр дьарыктанан элбэх Арассыыйатааҕы, өрөспүүбүлүкэтээҕи ааҕыылар лауреаттара, уопсастыба олоҕор көхтөөхтүк кыттар киэн туттар үөрэнээччибит буолар.
«Үөрэнээччи сөбүлүүр учуутала» үрдүк ааты сүктүлэр: Кристина Старостина, Ньургуйаана Уварова. Оттон төрөппүт билиниитин ылар учууталларынан буоллулар: Светлана Романовна Винокурова, Варвара Павловна Трофимова.
Ити курдук, сыллааҕы ситиһиилэри түмэр, бэлиэтиир тэрээһиммит үрдүк таһымҥа ааспытыттан бары олус астынан тарҕастыбыт. Бүгүҥҥү үөрүүлээх тэрээһин өссө үрдүк ситиһиилэргэ кынаттаатын!
Валентина КРИВОШАПКИНА, Харбалаах, Таатта
