Москваҕа баар биир дойдулаахтарбыт, волонтердар көхтөөхтүк үлэлииллэр. Кинилэр сүрүн сыалларынан – Саха сириттэн сылдьар байыаннай дьайыы кыттыылаахтарыгар, госпиталларга сытар байыастарга көмө, өйөбүл буолуу.
Волонтердар госпиталларга сылдьан, бааһырбыт байыастарга ас-таҥас, наадалаах мал-сал илдьэн биэрэллэр, санааларын көтөҕөллөр, кыһалҕаларын быһаарарга көмөлөһөллөр. Бу үлэ – бары биир санаанан салайтаран, бэйэ-бэйэҕэ көмөлөһөр, өйөһөр үтүө үгэс буолар. Кинилэр үтүө дьыалалара биһигини барыбытын сомоҕолуур.
Бу күннэргэ Москваҕа Саха сирин бэрэстэбиитэлистибэтин остолобуойугар волонтердар түмсэн ас астаатылар. Ол туһунан волонтер Светлана Диодорова-Лаврентьева бу курдук кэпсиир:
— Биһиги, билигин Москваҕа баар волонтердар түмсэммит, байыаннай госпиталларга эмтэнэ сытар саллааттарга анаан субуотунньук бэрээдэгинэн, ас астаатыбыт. Ким даҕаны туора туран хаалбакка кыттыста. Чыыр балыктан индигирка, алаадьы, бэрэски, сахалыы лапсалаах эттээх миини астаатыбыт. Саллаат ийэтэ Лена Егорова Аллараа Халыматтан ыыппыт чыырдарын ыраастаан уолаттар тоҥнуу сииллэригэр салаат оҥорон бэлэмнээтибит. Тус-туспа бакыаттарга угаттаатыбыт, биир дьааһык тобус-толору буолла. Үтүө санаалаах балыксыттарбытыгар махтал тылларын тиэрдэбит. Уолаттарбыт бэйэлэрин төрүт астарын аһаан, күүс-уох эбиниэхтэрэ, түргэнник үтүөрүөхтэрэ.
