2026 сыл саҕаланыаҕыттан Саха сиригэр нэһилиэнньэ дьарыктаах буолуутун сулууспаларын көмөлөрүнэн, байыаннай дьайыы кыттыылаахтара, уопсайа 82 киһи уонна байыаннай сулууспалаахтар дьиэ кэргэттэрин 31 чилиэнэ үлэнэн хааччыллыбыттар.
Бу туһунан СӨ нэһилиэнньэ дьарыктаах буолуутун киинэ иһитиннэрэр. Байыаннай дьайыы кыттыылаахтарын уонна кинилэр дьиэ кэргэттэрин дьарыктаах буолууларын хааччыйыы үлэтэ РФ Бэрэсидьиэнэ Владимир Путин көҕүлээбит «Каадырдар» национальнай бырайыагы олоххо киллэрии чэрчитинэн ыытыллар.
Идэҕэ үөрэтии уонна хаттаан бэлэмнээһин ыытыллар: байыаннай дьайыы 8 кыттыылааҕа эбии профессиональнай үөрэҕи бүтэрбиттэр, 21 бэтэрээн (погрузчик суоппара, бульдозер машиниһа, урбаан үлэтин төрүтэ идэлэригэр) үөрэнэллэр.
Бүтүн Арассыыйатааҕы «Работа России. Время возможностей» дьаарбаҥкаҕа дьарыктаах буолуу кииннэрин өҥөлөрүнэн байыаннай дьайыы кыттыылаахтара — 53 киһи туһаммыт.
—Биһиги сорукпут — эйэлээх олоххо эргиллэн кэлбит уолаттар дойдуларыгар туһаны аҕалаллара, төрөөбүт сирдэрин туһугар үлэлииллэрэ. Дьарыктаах буолуу сулууспалара кинилэргэ үлэҕэ киирии араас хайысхаларын билиһиннэрэллэр. Маныаха ким эрэ бырамыысыланнаска, ким эрэ гражданскай сулууспаҕа барар. Кинилэр үлэни сыаналыыллар, кинилэргэ мэлдьи эрэниэххэ сөп, — диэн СӨ ыччат дьыалатын уонна социальнай алтыһыытын миниистирэ, байыаннай дьайыы бэтэрээнэ Петр Шамаев бэлиэтиир.
Саха сиригэр байыаннай дьайыы биир бэтэрээнэ Сергей Горохов Дьокуускай аэропордугар тырааныспарга куттал суох буолуутун иниспиэктэринэн үлэҕэ киирбитэ. 2026 сыллаахха тохсунньуга кини Дьокуускайдааҕы каадыр киинигэр чопчуласпытын кэнниттэн, кэлим өйөбүлү оҥорбуттар: профориентацияны ыыппыттар, резюметын оҥорорго көмөлөспүттэр, үлэ миэстэтин талбыттар, уо.д.а.
—Дьарыктаах буолуу сулууспатыгар махтанабын. Үлэбин сөбүлүүбүн, — диэн Сергей Горохов махтанар.
Сиһилии: https://www.sakha.gov.ru/news/47528
СӨ Ил Дарханын уонна Бырабыыталыстыбатын пресс-сулууспата