Аҕа дойду Улуу сэриитин бэтэрээннэрин олорор усулуобуйаларын тупсарыыга матырыйаалынай көмө 2008 сылтан оҥоһуллар. Быйыл маннык көмө 2 мөлүйүөнтэн тахса солкуобай суумаҕа 66 бэтэрээҥҥэ оҥоһулунна.
Оттон 2025 сылга 11 мөл. солкуобай кэриҥэ суумалаах көмөнү 326 киһи ылбыта диэн Саха сирин Үлэҕэ уонна социальнай сайдыыга министиэристибэтигэр иһитиннэрдилэр.
Саха сиригэр аҕам саастаах дьону өйүүр үлэ Арассыыйа Бэрэсидьиэнэ Владимир Путин сорудаҕынан олоххо киирэр «Дьиэ кэргэн» уонна «Уһун уонна көхтөөх олох» нацбырайыактар, ону тэҥэ «Биир ньыгыл Арассыыйа» баартыйа норуодунай бырагырааматын «Аҕам көлүөнэ» бырайыагын сыалларын-соруктарын толорор.
«Аҕам саастаах дьон көхтөөхтүк олоруохтаахтар, хас биирдии күнтэн үөрүөхтээхтэр, бэйэлэрин уопуттарын эдэр көлүөнэҕэ тириэрдиэхтээхтэр, сөбүлүүр дьарыктарынан дьарыктаныахтаахтар», — диэн Ил Дархан, «Биир ньыгыл Арассыыйа» баартыйа Саха сиринээҕи эрэгийиэннээҕи салаатын сэкирэтээрэ Айсен Николаев бэлиэтээн турар. Өрөспүүбүлүкэ судаарыстыбаннай бүддьүөтүттэн бу сыалларга сыл аайы үп-харчы көрүллэр.
«Дьиэбин өрөмүөннүүрбэр судаарыстыбаттан матырыйаалынай көмөнү сыл аайы ылабын. Бу кэм иһигэр дьиэ, биллэрин курдук, эргэрэр: турбалар, эркиннэр, ааннар саҥардыллыахтарын наада. Бу өйөбүл дьаһалын көмөтүнэн 92 сааспар тупсаҕай усулуобуйаҕа олоробун. Өрөспүүбүлүкэ Бырабыытылыстыбатыгар, Саха сирин Үлэҕэ министиэристибэтигэр кыһамньыларын уонна өйөбүллэрин иһин махтанабын. Социальнай үлэһиттэр олус көмөлөһөллөр, бары көрдөһүүлэргэ болҕомтолоохтор уонна наадалаах көмөнү оҥороллор. Кинилэргэ улахан махтал!» — диэн бэлиэтээтэ тыыл бэтэрээнэ Петр Исаев.
Бэтэрээннэргэ биирдэ бэриллэр матырыйаалынай көмө харчынан төлөнөр. Өрөспүүбүлүкэ бастакы зонатыгар олорор бэтэрээннэргэ дьиэни өрөмүөннүүргэ матырыйаалынай көмө муҥутуур кээмэйэ 50 тыһ. солкуобайга диэри, оттон иккис зонаҕа олорор бэтэрээннэргэ 30 тыһ. солкуобайга диэри буолар.
Дьиэни өрөмүөннүүргэ матырыйаалынай көмө 2021 сылга 428 бэтэрээҥҥэ, 2022 с. — 365, 2023 с. — 272, 2024 с. — 339 бэтэрээҥҥэ оҥоһулунна.
Саха сиригэр көхтөөхтүк уһуннук олоруу бырагыраамата саҥардылынна, 2025–2030 сылларга аналлаах саҥа эрэгийиэннээҕи бырагыраама ылылынна.