Дьокуускай куорат үөрэнээччитэ Тимур Местников муус устар 21–24 күннэригэр Москваҕа ыытыллыбыт физикаҕа Дж.Кл. Максвелл аатынан олимпиада муҥутуур кыайыылааҕынан буолла. Ахсыс кылаас үөрэнээччитэ урукку өттүгэр ханна да көрсүбэтэх уустук сорудахтарын толорон, 100 баалтан 91,6 баалы ылла.
«Сорудахтар олус уустук этилэр, манныктары оскуола да бырагырааматыгар, атын да олимпиадаларга көрсүбэтэҕим. Экспериментальнай туур бастакы сорудаҕа өйбөр хатанан хаалбыт, маҥнай көрөргө олус уустук уонна кутталлаах курдуга: улахан баҕайы уруһуйтан уонна тиэкистэн турара. Ол эрээри үлэлээн барбытым кэннэ олус чэпчэки буолан биэрбитэ, саҕалыахха эрэ диэн эбит. Физика уонна информатика — миэхэ саамай сөбүлүүр биридимиэттэрим», — диэн кэпсээтэ Тимур Местников.
Олимпиадаҕа Тимур бэйэтэ бэлэмнэммит уонна түмүк түһүмэх иннинэ ХИФУ айылҕа билимнэрин факультеттарын куорпуһугар кылгас кэмнээх күүстээх бэлэмнэниини ааспыт.
Тимур Местников Дьокуускайга В.П. Ларионов аатынан Физико-тэхиниичэскэй лиссиэй 8-с кылааһыгар үөрэнэр. Кини бүтүн Арассыыйатааҕы таһымнаах олимпиадаҕа бастакытын муҥутуур кыайыыны ситистэ. Бу иннинэ кини СФУ (Сибиирдээҕи федеральнай университет) физикаҕа «Бельчонок» олимпиадатын, НГУ (Новосибирскайдааҕы судаарыстыбаннай университет) математикаҕа «Всесибирская открытая олимпиада школьников» олимпиадатын түмүк түһүмэхтэригэр уонна Саха сирин үөрэнээччилэрин информатикаҕа олимпиадатыгар кыайыылаах буолбута.
Маны таһынан, кини ХИФУ Математика уонна информатика институтун элементарнай математикаҕа Аһаҕас чөмпүйэнээтин ситиһиилээхтик кыттыбытын иһин анал бириис хаһаайына, ХИФУ ИМИ программированиеҕа «А» категорияҕа Аһаҕас өрөспүүбүлүкэтээҕи хамаанданан олимпиадатын II истиэпэннээх дипломана буолар.
Бэс ыйыгар Москваҕа Мстислав Келдыш аатынан информатикаҕа олимпиада түмүк түһүмэҕэр кыттар былааннаах. Инникитин Тимур Местников билиитин салгыы чиҥэтэн, үрдүк ааттаах-суоллаах үөрэх кыһатыгар киирэр баҕалаах.