Таатта улууһун олохтооҕо эмиэ итирик туруктаах «Камаз» уруулугар олорбут — билигин кини холуобунай эппиэтинэскэ тардыллыаҕа.
ИДьМ Томпо улууһунааҕы салаатын дознавателэ 43 саастаах Таатта улууһуттан төрүттээх эр киһиэхэ РФ Холуобунай кодексатын 264.1 ыстатыйатынан («Административнай накаастабылга тардыллыбыт эбэтэр сууттаммыт киһи итирик туруктаах көлөнү ыытыыта») холуобунай дьыала тэрийдэ.
Ааспыт сылга уорбаланааччы итирик туруктаах массыынаны ыыппытын иһин административнай накаастабылга тардылла сылдьыбыта. Оччолорго Таатта улууһун мировой судьуйатын уурааҕынан киниэхэ биир сыл аҥаардаах болдьоххо тимир көлөнү ыытар быраабын быһыы уонна 45 000 солкуобай суумалаах ыстараап көрүллүбүтэ.
Ол эрээри, эр киһи мантан сөптөөх түмүгү оҥостубакка, бэйэтин уонна суол кыттыылаахтарын олохторун кутталга киллэрэн, быйыл муус устар ыйга эмиэ итирик туруктаах «Камаз» таһаҕас таһар массыына уруулугар олорбут диэн суруйар ИДьМ пресс-сулууспата.
Хаартыска: ИДьМ пресс-сулууспата.