2025 сыллаахха Саха Өрөспүүбүлүкэтин Ил Дарханын Гранын биир кыайыылааҕынан Мэҥэ Хаҥалас улууһун «ДОВЕРИЕ» социальнай өйөбүлгэ наадыйар ыалы кытта үлэлиир тэрилтэ буолбута. Уонна бу кэмиэрчэскэйэ суох тэрилтэ «14-тэн 35–гэр диэри саастаах инбэлиит оҕолору уонна ыччаты олоххо бэлэмниир, эрчийэр хос» диэн бырайыагын олоххо киллэрэригэр 1924000 солкуобай суумалаах үбүнэн өйөбүл оҥоһуллубута.
Бырайыагы олоххо киллэрии бу дьыл тохсунньутуттан соторутааҕыта тэриллибит “Дьиэ кэргэни кытта үлэлэһэр хайысхалаах МФЦ” иһинэн саҕаламмыта. Үлэ сүрүн хайысхатынан доруобуйаларынан хааччахтаах инбэлиит оҕолору, ыччаты олоххо бэлэмнээһин уонна кинилэри дьарыктыырга, дьиэҕэ майгынныыр анал усулуобуйаны тэрийии буолар. Онон сибээстээн Грант үбүнэн араас дьарыктары уонна айар маастар-кылаастары ыытарга аналлаах аныгы тэриллэри уонна дьарыктанар хос тупсаҕай көстүүлээх, бары өттүнэн табыгастаах буоларыгар анал миэбэл ылыллыбыта.
Бу бырайыакка кыттыыттан инбэлиит ыччат олохторугар саҥа кэрдиис кэм саҕаламмыта – манна кинилэр аһы астыырга, бэйэлэрин көрүнэргэ үөрэнэллэр уонна тэҥнээхтэрин кытта бииргэ алтыһаллар, доҕордоһор ыырдара кэҥиир, уопут атастаһаллар, бэйэ-бэйэлэрин өйөһөллөр. Маны таһынан дьарыкка сылдьааччылар ускуустуба нөҥүө бэйэлэрин көрдөрөр уонна ис кыахтарын, талааннарын арыйар кыахтаналлар. Саҥаттан саҥа көрсүһүүлэр уонна бииргэ ыытыллар араас тэрээһиннэр үтүө санааны, бэйэҕэ эрэли үөскэтэллэрэ олус улахан суолталаах. Манна кинилэр доҕоттору эрэ буолбакка, хас биирдии киһиэхэ ис кыаҕын уонна талаанын арыйарга көмөлөһөр настаабынньыктарын булбуттара. Онон бу эрчиллии хоһо таптал, өйдөһүү уонна өйөбүл уйатынан буолбута.
Бырайыак олоххо киириитин кэмигэр саамай чаҕылхай уонна бастакы тэрээһининэн ыам ыйын 14 күнүгэр биһиги эдэр талааннарбыт бастакы инклюзивнай «Арыллыы» диэн күрэскэ кыттыылара буолбута. Бу күрэс доруобуйаларыгар уратылаах оҕолорго уонна эдэр ыччакка анаан тэриллибитэ. Тэрээһиҥҥэ араас хайысхаларынан барыта улуустан холбоон 140 талааннаах кыттааччы мустубута, ураты талаанын көрдөрбүтэ. Дьүүллүүр сүбэ уһулуччу тус көрүүлээх, ис сүрэхтэн оҥоһуллубут үлэлэри көрөн сөҕүөхтэрин сөхпүттэрэ.
Биһиги ыччаппыт «Декоративнай-прикладной айымньы», «Уруһуй», «Вокал», «Хореография» уонна «Видео» анал ааттарга лауреат уонна дипломант буолбуттара, айар үлэлэрин иһин муҥутуур биһирэбили ылбыттара. Ол курдук, Ирина Пахомова 2-с истиэпэннээх, Айталина Тарасова 3-с истиэпэннээх лауреат, Дьулус Николаев, Борис Расторгуев, Айаал Слепцов уонна Ая Татаринова күрэс дипломаннара буолбуттара. Ону тэҥэ, бу кыайыы үгүс чаҕылхай уонна дьоллоох түгэни бэлэхтээн, оҕолорго эрэл бэлиэтин, бырайыак бары хамаандаларыгар дьиҥнээх бырааһынньык уонна киэн туттуу төрүөтүнэн буолбута. Күрэс бэйэҕэ эрэллээх буоллахха уонна ханнык да мэһэйдэргэ үтүрүйтэрбэккэ, инники диэки дьулустахха, кыаллыбат суоҕун көрдөрбүтэ.
Биһиги үлэбит доруобуйаларынан хааччахтаах эдэр дьоҥҥо олоххо бэйэлэрин миэстэлэрин буларга, уопсастыба тэҥ уонна көхтөөх чилиэннэрэ буоларга көмөлөһөр. Бэйэҕэ эрэллээх уонна ыарахаттар иннилэригэр хаһан да бэриммэт буоларга холобур көрдөрөр.
Бастакы ситиһиилэринэн кынаттаммыт эдэр дьон сулустарга айаннара салҕанан бара турар, кинилэри өссө да элбэх ситиһиилэр уонна кыайыылар күүтэллэр!
Мария ЗЫКОВА, Мэҥэ Хаҥаластааҕы нэһилиэнньэ социальнай көмүскээллээх буолууга кэлим киинин социальнай педагога.