Бүтүн Арассыыйатааҕы Бибилэтиэкэ күнүгэр Национальнай бибилэтиэкэҕэ үөрүүлээх тэрээһин буолан ааста.
Бу күн Иван Крафт аатынан Ил Дархан бириэмийэтин, библиотечнай дьыалаҕа уһулуччулаах ситиһиилээх лауреаттарга туттардылар. Кыайыылаахтары «Сыл бибилэтиэкэтэ», «Сыл бибилэтиэкэрэ», «Попечитель уонна меценат» хайысхаларынан чиэстээтилэр.
«Сыл бибилэтиэкэтэ» номинацияҕа Булуҥ улууһун кииннэммит библиотечнай ситимэ кыайда. Бу Арассыыйа биир саамай хотугу бибилэтиэкэтэ уонна «Култуура» национальнай бырайыагын чэрчитинэн саҥардан оҥоһуллубут бастакы бибилэтиэкэнэн буолар. Тиксии бөһүөлэгин оҕолорун уонна ыччатын түмэр элбэх өҥөнү оҥорор киининэн буолла. Сыл аайы бибилэтиэкэ 1,5 тыһыынчаттан тахса киһиэхэ 38 тыһыынчаттан тахса кинигэни, брошюраны уонна периодическай таһаарыылары уларсар.
«Сыл бибилэтиэкэрэ» (библиограба)» номинацияҕа Нам улууһун кииннэммит библиотечнай ситимин кыраайы үөрэтэр салаатын бибилэтиэкэр Раиса Дьяконова наҕараадаланна. Кини салалтатынан «Нам улууһун кыраайы үөрэтээччилэрэ» мультимедийнай сиэрийэлээх ыйынньык оҥоһулунна. Максим Аммосов олоҕор уонна үлэтигэр аналлаах «Максим Яркий» портал уонна «Эҥсиэли хочотун 100 сыллаах 100 биллэр дьоно» социокультурнай бырайыак курдук бырайыактар олоххо киирдилэр.
«Попечитель уонна меценат» номинацияҕа «Таттаавтодор» акционернай уопсастыба генеральнай дириэктэрэ Иван Бочонин бэлиэтэннэ. Кини 2019 сылтан 2026 сылга диэри 38 мөлүйүөн солкуобай суумалаах спонсорскай уонна материальнай көмөнү оҥордо. Бу үпкэ — улуус үтүөлээх дьонун ааттарын үйэтитиигэ, Саха норуотун култууратыгар уонна Таатта улууһун устуоруйатыгар аналлаах 50-тан тахса кинигэ бэчээттэннэ.